Día del Llibru Asturianu

El Procesu Batura sigue'l so camín "participativu y ilusionante" tres el primer alcuentru d'Uviéu

|
Cartelu conceyu abiertu de Xixón de Procesu Batura

Celebra agora en Xixón un conceyu abiertu nuevu pa continuar col repasu y análisis del "papel de la izquierda soberanista asturiana en términos sociopolíticos y estratéxicos".

Nel inaugural entamáu nel uvieín Llar La Llegra'l sábadu, nel que participaron unes trenta persones, presentóse nun primer momentu'l Procesu Batura y aprobóse l'orde del día coles cuestiones a tratar. Asina, por exemplu, aldericóse sobre qué yera y qué representaba pa les y los presentes sentise anguaño parte políticamente d’una izquierda soberanista asturiana, analizóse al traviés d’un sistema DAFO (qu’atiende pa les Debilidaes, Amenacies, Fortaleces y Oportunidaes d’un contestu social concretu) la situación d’esti espaciu políticu, propunxéronse dellos puntos y idées p’ameyorar la so situación y falóse de la manera de coordinase y actuar pa facer medrar organizativamente l’espaciu ideolóxicu que representa la izquierda soberanista n’Asturies.

A la hora d’analizar les debilidaes d’esti espaciu políticu sorrayóse "la falta de referentes, d’espacios de contrapoder organizativu y mediáticu, asina como de la desventaxa económica qu’afronten les polítiques non sucursalistes nin subalternes", resúmese nun documentu. Mentes, "les amenaces vienen, en xeneral, de la mano de la ofensiva del capitalismu más depredador de derechos, cola medra del fascismu y l’españolismu mesmo nel campu institucional como na sociedá".

No que respeuta a les oportunidaes vese esti momentu, "nel que se ta reconfigurando tol campu de la izquierda n’Asturies, como un intre clave pa facer cristalizar les posiciones soberanistes n’espacios autónomos, non dependientes d’organizaciones d’ámbitu ayén al país, que vienen d’un ciclu eleutoralista con mui pocos llogros nel so haber y con una desmovilización social que procesos como esti han revertir". Por último, analízase como fortaleza "ver qu’inda nestes condiciones caltiénense unos mínimos que xustifiquen el filu conductor de la izquierda soberanista y qu’esti espaciu tien bien interiorizaes cuestiones organizatives como la horizontalidá y polítiques como la interseccionalidá ente lluches y enfoques radicales-tresformadores de la sociedá".

Estratexes

En cuanto a les estratexes y a les midíes que podríen facer ameyorar la situación d’esti espaciu políticu, "afitóse la necesidá de convertir esti procesu nun espaciu permeable y dafechu abiertu a la participación, calteniendo les dinámiques de base". Pel momentu, el Procesu Batura va treslladar estos alderiques a otres poblaciones del país, siendo la parada siguiente en Xixón, col enfotu puestu nun primer actu simbólicu pa esti 25 de mayu "nel que se puedan dir amosando delles conclusiones d’esti procedimientu participativu".

La cita próxima va ser mañana, na Sociedá Cultural Xixonesa, dende les 17.30 hores. Al conceyu abiertu tán convidaes "toles persones que se sientan partícipes ideolóxica y políticamente del espaciu políticu de la izquierda soberanista asturiana".

Contador Estadistiques