El Procesu Batura celebra'l so primer conceyu abiertu

Trátase d'un proyeutu d’alderique y construcción entamáu dende la izquierda soberanista asturianista col enfotu de reconstruyir esti espaciu políticu.

La primer xornada pública del Procesu Batura va desendolcase’l sábadu dende les 17.30 hores n'Uviéu, nel Llar La Llegra (El Postigu Baxu, 40). Ésta va tar centrada en principiar a dar pasos pa la organización d’un procesu que va siguir cola convocatoria de dellos conceyos abiertos per distintos llugares d’Asturies demientres los meses próximos.

"Facemos un llamáu a averase a Uviéu p’arrimar el llombu y da-y un emburrión a un procesu abiertu y de base que tien por enfotu analizar la situación sociopolítica na que s’atopa Asturies y les nueves posibilidaes y retos a los qu’ha enfrentase la izquierda soberanista nel futuru", animen los entamadores del Procesu Batura, qu'entienden que "tamos énte una situación d’emerxencia social si se repasen les problemátiques principales del país, pero tamién creemos que ye’l momentu pa ello si atendemos a la necesidá y la posibilidá real de construyir les alternatives que, dende valores como la solidaridá de clas, la xusticia social, la participación popular, l’internacionalismu, el sentíu críticu, l’anticapitalismu, el feminismu o la visión de país p’Asturies conquisten un futuru con capacidá de decisión en tolos aspeutos de les nueses vides". La intención final ye la convocatoria d'un gran Conceyu Nacional nuna fecha cercana al 25 de mayu que "asoleye los frutos d’esti procesu qu’acaba d’entamar".