“El principal oxetivu ye dar visibilidá a la situación del asturianu nel ámbitu académicu y políticu de Madrid”, esplica Galán

La selmana próxima, el miércoles y el xueves, va celebrase na Universidad Autónoma de Madrid el I Congresu Internacional sobre la Llingua Asturiana baxo’l títulu ‘Distintividá, identidá y oficialidá’. Avelino Corral ye’l so impulsor en collaboración con Iniciativa pol Asturianu y nél van participar representantes d’universidaes de tol mundu.

“El principal oxetivu ye dar visibilidá a la situación del asturianu tanto nel ámbitu académicu, ente la xente del mundu de la llingüística en Madrid, como tamién nel políticu”, afirmó esta mañana Inaciu Galán, vocal de Rellaciones Institucionales d’Iniciativa pol Asturianu y miembru del comité organizador xunto con Corral y Ana González-Rivas, na presentación del congresu, onde tuvo acompañáu pol presidente del coleutivu, Iván Llera. “Al principiu esperábemos tar n’otra fase del procesu d’oficialidá y que’l congresu tuviera más repercusión y pudiera ser más útil, que fora un foru nel que tar falando de cuándo podríemos tener na Mesa del Congresu l’Estatutu d’Autonomía p’aprobalu, pero de momento nun ye posible. Sí queremos aprovechar la oportunidá igualmente pa contar qu’equí tamos nesti procesu, que va más despaciu de lo que nos gustaría; que tenemos yá toles ferramientes construyíes y qu’esta llingua tien un encontu científicu detrás y una sociedá que sofita la so oficialidá. Queremos enseñar lo que se ta faciendo nel ámbitu de la llingüística y de la sociollingüística”, añadió.

Pa ello va contar cola participación de Xosé Antón González Riaño, que va abrir el congresu cola primera de les trés grandes ponencies, de nome ‘Lengua asturiana: la oficialidad que Asturias necesita’; Ramón d’Andrés cola segunda, ‘La llingüística y les llingües minorizaes'; y Michael Metzeltin (Universität Wien), que va pesllalu con ‘Lengua asturiana: tipología y poder’, amás de la presencia d’otros espertos como Francisco Xavier Frías Conde, Gonzalo Llamedo, Taresa Fernández Lorences, David Guardado o Isabel Álvarez Sancho, ente otros. En total 21 intervenciones físiques o en llinia de representantes de les universidaes d’Uviéu, Tennessee, Zürich, Varsovia, Oxford, Oklahoma, Vigo o Washington, ente otres, y la UNED.

“Ye una manera d’afitar el sofitu que tuvo l’asturianu y la oficialidá nel manifiestu que promovimos dende Iniciativa pol Asturianu y que sofitaron más de 300 profesores universitarios y persones del ámbitu académicu y la investigación”, apuntó Llera. “Ye mui importante que se vea que nel mundu son conscientes de la situación d’Asturies y que la sofiten”, siguió.

Inscripción entovía abierta

Dientro del alcuentru va aldericase de diverses cuestiones como les actitudes llingüístiques sobre l’asturianu, les perífrasis verbales na llingua asturiana, la música n’asturianu o un estudio sociollingüísticu nel sieglu XVI y XVII. Tamién va a haber espaciu pa la presentación de la obra ‘Volved las manos al bable’ de Galán.

El primer Congresu Internacional sobre la Llingua Asturiana na Facultá de Filosofía y Lletres de la Universidad Autónoma de Madrid, que cuenta tamién col sofitu de l’Academia de la Llingua Asturiana, va ser presencial y nun se va emitir en direuto per Internet, anque la idea d’Iniciativa pol Asturianu ye grabar la totalidá del congresu pa ponelu depués a disposición de toles persones interesaes. La inscripción ta entovía abierta na páxina d’esti eventu académicu.

El vocal de Rellaciones Institucionales quixo agradecer a la Universidad Autónoma de Madrid toles facilidaes pa la organización d’esta iniciativa, lo que “vuelve a enseñanos que fuera d’Asturies, polo xeneral, nun suel haber prexuicios pa col asturianu. Los prexuicios tenémoslos equí”.

Un consensu ampliu

Tolos diputaos y senadores asturianos en Madrid foron convidaos a asistir a les ponencies y comunicaciones, tamién responsables d’Educación y Cultura d’otres fuercies polítiques “pa que tengan una perspeutiva sobre lo que ta pasando n’Asturies cola cuestión llingüística”, con bona receptividá nun primer momentu. “Siguimos trabayando na mesma llinia p’algamar un consensu ampliu sobre la oficialidá”, rescampló Galán, qu’espera que’l cambiu na presidencia estatal del PP, cola llegada d’Alberto Núñez Feijóo, “sía una oportunidá de da-y la vuelta a esa posición que tuvo nos últimos años” el PP asturianu “y que nun coincide cola so posición histórica, que foi d’apoyu a la oficialidá n’otros momentos”.

Na semeya, Galán y Llera.