El Congresu Internacional sobre la Llingua Asturiana celebra en Madrid una segunda edición

Esti miércoles y xueves espertos d'una decena d'universidaes van tomar parte nel II Congresu Internacional sobre la Llingua Asturiana que s'entama na Universidad Autonóma de Madrid. Esti simposiu d’analísis y estudiu pretende afondar nel conocimientu del idioma y de la importancia de la declaración de la oficialidá pal so futuru.

Al igual que la primer edición, celebrada nel 2022 baxo’l títulu de ‘Distintividá, identidá y oficialidá’, que se caltién pa la que va entamar el miércoles, repite na Facultad de Filosofía y Letras de la universidá madrilana. Impúlsala’l profesor Avelino Corral en collaboración con Iniciativa pol Asturianu y va contar cola participación d’espertes y espertos de les universidaes d’Uviéu, Ștefan cel Mare (Suceava), Vigo, Oklahoma State, California Riverside, Sussex, The City University of New York, Granada y Burgos.

Ana María Cano va encargase de la primer conferencia del congresu, ‘Aportaciones del ‘Diccionariu Etimolóxicu de la Llingua Asturiana (DELLA)’ a la llingua asturiana y de mou especial a l’antroponomástica’ a les 9.30 hores, depués de la inauguración oficial. Nesta primer xornada van intervenir Claudia Elena Menéndez Fernández, Llucía Menéndez Díaz, Cristina Bleortu, Miguel Cuevas, Patricia Fernández Martín, Adrián Martínez Expósito, Isabel Álvarez Sancho, Miriam Villazón, Alba Arias, Covadonga Lamar, Carmen Ainoa Martínez Cuervo, Julio Villa y Inaciu Galán.

Na xornada del xueves van poner comunicaciones Darío de Dios, Lourdes Montes, Xavier Frías Conde, Michela Russo, Aymara González Montoto, David Guardado, Violeta Cabellero y Llucía Menéndez Menéndez. Dende Iniciativa pol Asturianu apunten que l’oxetivu d’esti congresu ye crear “un espaciu pal alcuentru científicu acerca de la realidá social qu’arrodia a la llingua asturiana” y al empar “siguir sumando perfiles del ámbitu universitariu al trabayu pol idioma, asina como facer llegar esa realidá a instituciones universitaries de tol mundu”.

Na semeya, Iván Llera y Galán, d'Iniciativa pol Asturianu, na presentación del congresu celebrada en Xixón esta mañana.