El Premiu al Pueblu Exemplar d'Asturies d'esti añu ye p'Asiegu

Con 98 vecinos censaos, esta población de Cabrales foi la más valorada pol xuráu ente les ventiséis candidatures presentaes.

La Fundación Princesa de Asturias dio a conocer esta mañana'l fallu del xuráu del XXX Premiu al Pueblu Exemplar d'Asturies. El gallardonáu d'esti añu ye Asiegu al ser "el pueblu, aldea, nucleu de población, espaciu paisaxísticu o grupu humanu del Principáu d'Asturies" de los participantes que más destacó esti 2019 "na defensa y conservación del so entornu natural, ambiental, del so patrimoniu históricu, cultural o artísticu, n'iniciatives d'impulsu económicu y social o na realización d'obres comunales u otres manifestaciones de solidaridá sobresalientes”.

L'acta del xuráu valora'l llabor de l'Asociación Cultural Asiegu XXI, creada nel 1999 "pa recuperar la conciencia de comunidá y la iniciativa vecinal perdida pola crisis del mundu rural". Ente les sos munches actuaciones ta la recuperación de fotografíes históriques sobre dalgunos llogros de los vecinos y la so espublización en calendarios monográficos sobre la construcción de la carretera o la escuela, por citar dos exemplos; trabayos en comuña p'ameyorar les infraestructures pal pastoréu, la renovación del tendíu llétricu o la trayida d'agua; y la creación d'un centru social na escuela antigua, ente otres munches.

Asiegu, balcón privilexáu hacia Picos, cuenta con dos queseríes acoyíes a la DOP Quesu Cabrales, dellos agospios de turismu rural y l'itinerariu Ruta’l Quesu y la Sidra, y cuatro rebaños d'oveya xalda. Va recibir el so premiu'l 19 d'ochobre, un día depués de la ceremonia d'entrega de los Premios Princesa de Asturias, mientres una visita de los reis d'España al pueblu.

Respetu de la toponimia

El Premiu al Pueblu Exemplar d'Asturies vien espublizando les sos bases nes trés llingües que se falen nel país dende l'añu 2014 y respeta la toponimia tradicional, la oficial. El restu de candidatures qu'optaben al gallardón nesti 2019 foron la Cofradía de Pescadores Santa Ana (Llanes), Vaḷḷe de Cuna (Mieres), Llugones (Siero), Trapa-La Vega y El Carmen (Llangréu), Cue (Llanes), Suarías (El Valle Baḥu de Peñamellera), la comunidá vecinal de San Cucufate (Llanera), Peḷḷuno (Ayer), les xentes de la villa de Salas, Pimiango (Ribadeva), El Puertu (Somiedu), Pezós, Somao (Pravia), Banduxu (Proaza), Valle del Samuñu (Llangréu), Coya (Piloña), Asociación Ríu Fontoria (Piloña), el movimientu asociativu y la comunidá vecinal de Riosa, Posada (Llanes), Coviella (Cangues d'Onís), Valdesoto (Siero), la comunidá vecinal de Casu, Llaviana (Gozón), La Puela (Allande) y Fitoria y la Sociedad Festivo-Cultural San Antonio de Fitoria y Villamaxil (Uviéu).

Na imaxe, l'Urriellu vistu dende Asiegu. Semeya obra de xabeldiz baxo llicencia CC BY 2.0.