El Premio Nacional de las Músicas Actuales a Cuevas, 'Meyor noticia pal asturianu nel 2023'

Los usuarios que votaron nesta consulta d'Iniciativa pol Asturianu decidiéronse por esti reconocimientu del Ministeriu de Cultura "de forma mayoritaria" ente les 34 propuestes daes.

'El Ministeriu de Cultura concede a Rodrigo Cuevas el Premio Nacional de las Músicas Actuales' titulaba Asturies.com el 9 d'ochobre. Gallardonábenlu "pola singularidá de la so obra con una propuesta trescendente que xune música tradicional folclórica y música popular contemporánea" y valoraben que'l "so proyeutu artísticu aporta un fuerte compromisu pola diversidá".

La ciudadanía da importancia a esti recocimientu del Gobiernu estatal al músicu uvieín residente en Piloña y considera que tamién supón una bona noticia pal idioma. Na presentación del so currículu, el ministeriu apuntaba que l'espectáculu actual de Cuevas "nútrese de les cantares del álbum –en referencia a Manueal de romería'–, nel que fai usu del asturianu y del español como llingües vehiculares".

L'emplegu de la toponimia oficial na 'Y', segunda más votada

Algamó tamién importantes sofitos, hasta colocase en segunda posición, l’usu de la toponimia asturiana nos nuevos indicadores nel tramu nel que s'amplió a un tercer carril l’autopista ‘Y’. Ye la primer vez que la Demarcación de Carreteres del Estáu emplega los nomes de llugar oficiales na señalización de les víes asturianes.

En tercer llugar quedó la incorporación d’un resume con información n'asturianu en 'TPA Noticias 2', el boletín de la nueche. Ente les opciones más votaes figuren tamién el compromisu del Instituto Cervantes pa poner en marcha cursos pal deprendizaxe de llingua asturiana nos distintos centros que tien abiertos alredor del mundu, l’anunciu d’un decretu nuevu de toponimia que va permitir oficializar los topónimos xeográficos y la concesión de la Medaya d'Asturies a Xosé Lluis García Arias, primer presidente de l'Academia de la Llingua Asturiana.