El paru xube n’agostu en 84 persones n’Asturies, que lidera l’aumentu d’afiliación a la Seguridá Social

Llueu de seis meses siguíos de descensu del desemplegu, Asturies torna a rexistar un aumentu, anque de manera reducida. El mes d’agostu finó con 84 paraos más qu’en xunetu, un 0,15 por cientu, perbaxo de la media estatal, mentes que’l país lidera l’afiliación a la Seguridá Social hasta algamar la meyor cifra en 13 años.

Agostu, mes nel que suel medrar el paru al finar munchos contratos venceyaos col sector turísticu, tuvo n’Asturies un crecimientu moderáu. 84 persones más tán inscrites como demandantes d’emplegu en comparanza con xunetu, lo que dexa’l total en 54.417, una resistencia que dende’l Gobiernu d’Asturies venceyen a la prolloganción de la temporada y el bon comportamientu de la industria y la construcción, dos sectores menos suxetos a la temporalidá, con reducciones del 13,39 y del 11,25 por cientu, de manera respeutiva.

L’aumentu, del 0,15 por cientu, ye menor que la media estatal, del 0,93 por cientu al contar con 24.826 desemplegaos más hasta los 2.702.700, con namás La Rioja, únicu territoriu onde baxa’l paru, un 0,37 por cientu, y Murcia y Navarra, les dos con un 0,04 por cientu, con meyores cifres qu’Asturies. Les peores preséntenles Melilla (3,62 por cientu), Illes Balears (3,27) y Euskadi (2,34).

En términos interañales, el paru baxó nel país un mes más, y van 29, nesta ocasión en 4.807 persones, un 8,12 por cientu, superior a la media estatal, del 7,58 por cientu al menguar en 221.540. Illes Balears (15,74), Estremaúra (10,35) y Galicia (10) llideren la llista, con Melilla como únicu territoriu onde aumentó’l desemplegu, un 0,97 por cientu.

Descensu nel Estáu

Asturies lidera’l crecimiento de les afiliaciones a la Seguridá Social con 664 cotizantes más, un 0,17 por cientu, que pon el total en 385.065, la mayor cifra total de los 13 años últimos. A nivel estatal baxó un 0,89 por cientu.

No que respeuta a los contratos, firmáronse un total de 21.368, que suponen 4.595 menos qu’en xunetu y 1.743 menos que l’agostu pasáu.

Na semeya, una xornada na LXVI Feria Internacional de Muestres d'Asturies (FIDMA).