El paru medra n'ochobre per segundu mes

Si en setiembre frayó la tendencia de trés meses de descensu con 708 paraos más, nesti últimu sigue l'aumentu con otros 1.698.

Asturies suma dos meses d'ascensu nel númberu de demandantes d'emplegu. El país peslló ochobre con 79.704, lo que significa un aumentu del 2,18 por cientu con respeuto al mes anterior, superior a la media estatal, del 1,31 por cientu al sumar 49.558 que dexen el total en 3.826.043.

Los territorios con peores cifres son La Rioja, con un 6,42 por cientu; Illes Balears, con un 5,97 por cientu; y Castilla-La Mancha, con un 3,50 por cientu. Hai descensu del paru en Euskadi (4,34 por cientu), Comunitat Valenciana (0,88) y Murcia (0,43).

Dende'l Gobiernu recuerden que n'Asturies el medró paru n'ochobre nes dos décades últimes, siendo l'actual la cuarta menor xuba de los 11 años últimos. L'añu pasáu ésta foi de 2.493 persones, lo que supunxo un aumentó del 3,69 por cientu.

En términos interañales, sicasí, el crecimientu nel país foi del 13,76 por cientu al tener 9.642 paraos más qu'hai doce meses. Esti porcenaxe ye menor a la media estatal, que foi del 20,40 por cientu, con Illes Balears liderando negativamente esta llista con un 61,53 por cientu y con Melilla como únicu llugar onde hai un descensu (3,48 por cientu).

Aumenten les afiliaciones a la Seguridá Social

N'ochobre firmáronse n'Asturies 24.951 contratos, el 2,60 por cientu menos que nel mes precedente, de los que 2.194 foron indefiníos. Al empar, les afiliaciones a la Seguridá Social aumentaron en 3.139 persones, el 0,87 por cientu, lo que supone una recuperación del emplegu hasta algamar los 362.156 cotizantes.