El paru aumentó en 1.810 persones n'Asturies nel mes de payares

Asturies suma trés meses siguíos d’aumentu de les cifres del paru. En payares, depués de los 1.698 d’ochobre, rexistráronse 1.810 demandantes d’emplegu más, lo que supón un aumentu del 2,27 por cientu, superior a la media estatal, que foi del 0,66 por cientu.

El sector servicios resultó’l más perxudicáu, yá que cerca de nueve de cada diez nuevos desocupaos correspuenden a ésti: con un incrementu de 1.591 persones, concentró’l 87,9 por cientu de les inscripciones de payares. Asina, les xubes más altes concentráronse nos conceyos con mayor dependencia de les actividaes turístiques, como Cangues d’Onís (16,02 por cientu), Ribeseya (15,11) y Cabrales (14,50).

Los 1.810 desemplegaos más n’Asturies ponen el total en 81.514 persones y supón una medra del 2,27 por cientu, cuando nel Estáu la media asitióse nun 0,66 por cientu con 25.269 (3.851.312). Namái baxa’l paru n’Euskadi (4,36 por cientu), Castilla-La Mancha (0,90) y la Comunidad de Madrid (0,14), mentes que les peores cifres danse n’Illes Balears (4,43), Galicia (3,40) y La Rioja (3,36).

En términos interñales, el país tien 10.637 demandantes d’emplegu más, esto ye un 15,01 por cientu más, siendo la media estatal de 20,42 por cientu. Illes Balears, con un 37,31 por cientu, sigue liderando esta estadística, con Canarias siguiéndola (27,23 por cientu), y la ciudá autónoma de Melilla ye l’únicu llugar onde hai una baxada, en concreto del 1,96 por cientu.

Respeuto a les cifras de cotizantes a la Seguridad Social, el númberu d’afiliaciones descendió n’Asturies en 1.574 persones (0,53 por cientu), y en 7.578 en comparanza con payares del añu 2019. La contratación baxó un 25,91 por cientu, con 6.465 alcuerdos llabores menos firmaos que'l mes anterior y "unos 10.000 menos" qu'hai un añu, según esplicó la xerente del Serviciu Públicu de Emplegu del Principáu d'Asturies (SEPEPA), Pilar Varela.