Asturies zarra agostu con 124 paraos más

El país, por contra, lidera les afiliaciones a la Seguridá Social xunto con Cantabria.

El paru medró n'Asturies n'agostu en 124 persones hasta asitiase en 65.490, lo que supón un aumentu del 0,19 por cientu, menor que la media estatal, que foi del 1,81 por cientu (54.371 persones pa quedar en 3.065.804). Namái consiguieron reducir el númberu de paraos les dos ciudaes autónomes, Mellilla (2,93 por cientu) y Ceuta (0,10 por cientu), amás de Castilla y Lleón, onde descendió en 6 trabayadores.

En términos añales, sicasí, baxó nun 4,10 por cientu (2.803 persones), cifra que meyora la media estatal, del 3,65 por cientu (116.264 persones). Lideren la llista Castilla y Lleón (6,50 por cientu), Galicia (6,45 por cientu) y Euskadi (6,09 por cientu), mentes que la zarren Illes Balears, con un aumentu del 0,55 por cientu, y Canarias y Aragón, con una mengua del 0,89 y del 1,58 por cientu, de manera respeutiva.

Baxó nel sector de l'agricultura

El Gobiernu d'Asturies destaca que'l país ye, con Cantabria, onde más medra la cifra de trabayadores n’alta llaboral, que s’asitia nos 374.110 y algama niveles del branu del 2011. Nel mes d'agostu'l númberu d'afiliaciones a Seguridá Social creció en 1.679, lo que supón una meyora del 0,45 por cientu frente al descensu estatal de 1,89 por cientu.

D'igual forma apunta que'l desemplegu interñal baxó de manera siguida n’agostu nos postreros seis años, depués de marcar un récor nel 2013 coincidiendo col momentu de más incidencia de la crisis económica. Amás, Asturies encadena 71 meses siguíos con retrocesos nel cómputu interañal.

No que respeuta a la evolución del paru mensual, apunta que'l paru aumentó n’homes (197) y baxó en muyeres (73), descendiendo nel coleutivu de persones ensin emplegu anterior y nel sector d’agricultura, mentes que medró no demás. Les xubíes foron n’Alministración pública, educación, sanidá, comerciu y actividaes rellacionaes col emplegu, anque se compensaron con descensos n’hostelería, servicios a edificios y actividaes rellacionaes cola xardinería.