El paru desciende en xunu hasta cuasi baxar de los 60.000 demandantes d'emplegu

|
Chiringu playa paru

Acumúlense cinco meses de mengua y les cifres son les meyores dende payares del 2008.

Asturies finó xunu con 60.170 paraos depués de rexistrar un descensu de 2.254 demandantes d'emplegu, un 3,61 por cientu. La media estatal foi del 1,45 por cientu al contar con 42.409 menos que dexen el total en 2.880.582.

Lidera la baxada del paru Illes Balears, con una mengua del 5,40 por cientu, siguíu por Castilla y Lleón (3,85) y Cantabria (3,74), con Asturies como la cuarta de la llista. Andalucía ye la única autonomía onde medra'l desemplegu, un 0,84 por cientu.

La disminución de la demanda de trabayu n'Asturies prodúxose en dambos sexos, en tolos tramos d'edá y en tolos sectores económicos. El sector servicios concentra la principal cayida en términos absolutos, con 1.810 paraos menos pol entamu de la temporada turística, pero la industria rexistra 4.434 desemplegaos, la menor cifra de tola serie histórica dende'l 1990.

En términos interñales, el país rexistra 12.189 demandantes menos –acumula 15 meses de baxada–, un 16,85 por cientu, nesti casu inferior a la media estatal, del 20,30 por cientu, con 733.757 menos. La mayor baxada dase tamién n'Iles Balears, un 45,42 por cientu, siguíu de Canarias (30,69) y la Comunidad de Madrid (26,75), y la menor ye la de Melilla (2,03), Euskadi (8,76) y Ceuta (12,30).

Consolidación del emplegu indefinío

En cuanto a la contratación, caltiénse la tendencia de los meses últimos, marcada por una fuerte recuperación del emplegu. Asina en xunu rexistráronse 28.150 contratos, un 14,17 por cientu más qu'en mayu, lo que duplica la tasa estatal.

Refuérzase tamién la consolidación del emplegu indefinío, con 10.229 contratos fixos, lo que supón el 36,33 por cientu de tolos rexistraos, cuando hai un añu yera del 8 por cientu. Otra manera, les afiliaciones a la Seguridá Social aumentaron en 1.615 el mes pasáu, hasta algamar les 374.864 persones ocupaes, el meyor datu dende setiembre del 2011.

AdxuntuTamañu
PDF icon Datos del paru xunu 2022861.18 KB
Contador Estadistiques