Asturies enllaza cuatro meses de baxada de la cifra del paru

La llista del paru baxó en mayu en 1.562 persones n’Asturies, un 2,44 por cientu, enllazando asina cuatro meses de cayida. A nivel estatal el total de desemplegaos descendió per primer vegada dende la crisis del 2008 de los 3 millones al rexistrar una mengua del 3,29 por cientu.

Si n’abril la cayida del desemplegu foi de 2.051 persones (3,11 por cientu), en mayu foi dalgo menor. Hai rexistraes 1.562 menos pa poner el total en 62.424, descensu impulsáu pol sector servicios, anque en términos relativos foi mayor na construcción (3,47 por cientu) y la industria (3,04 por cientu).

Illes Balears, con un 13,63 por cientu, lidera la baxada del paru, siguíu de La Rioja (6,33) y Estremaúra (5,20), mentes que los peores datos son los de la Comunitat Valenciana (1,26), Euskadi (1,91) y Asturies (2,44). La media estatal quedó nel 3,29 por cientu con 99.512 menos, que ponen el total en 2.922.991, esto ye, menos de 3 millones, una cantidá que nun se vía dende’l 2008.

En comparanza col añu anterior, n’Asturies hai 17.517 desemplegaos menos, lo que supón una baxada del 21,91, tamién perbaxo de la media estatal, del 22,70 al habar una mengua de 858.259. Illes Balears torna a liderar la llista con un 51,95 por cientu, con Canarias (30,16) y Catalunya (27,77) nes siguiente posiciones, y Melilla (6,70), Euskadi (7,56) y Galicia (11,61) nos puestos últimos.

El desemplegu xuvenil, nel nivel más baxu

El paru ente les persones menores de 25 años asítiase n’Asturies nel nivel más baxu de tola serie histórica, al descender en 353 persones en mayo (8,79 por cientu). Hai rexistraos 3.661 demandantes d’emplegu mozos, lo que supone la menor cifra desde 2006 y una mengua interañal del 40,44 por cientu.

Nos que se refier a les contrataciones en toles franxes d’edá, en mayu contabilizáronse 24.657 (2,89 por cientu), de les que 8.702 foron indefiníes y 15.955 temporales. Respeuto al mesmu mes del 2021, los contratos indefinidos crecieron el 355,6 por cientu.

L’afiliación a la Seguridá Social aumentó en 2.119 personas (0,57 por cientu), el meyor dato dende agosto del 2019 y el más altu pa un mes de mayu dende’l 2011. Actualmente hai 373.249 ocupaos nel país.