El númberu de desemplegaos n’Asturies sitúase en 83.181 tres una baxada nueva en mayu

Un descensu del 2,95 por cientu nel númberu desemplegaos n’Asturies nel mes de mayu dexa la cifra de paraos en 83.181. A nivel estatal, diose la mayor baxada del paru nesti mes dende l’añu 2006 y la cifra total de paraos queda en 4.189.659.

 
Según los datos espublizaos esti xueves pol Ministeriu de Trabayu y Inmigración, la cifra total de paraos n’Asturies baxó en 2.529 persones d’abril a mayu, lo que supón una baxada del 2,95 por cientu. A nivel estatal, los mayores descensos viviéronse nes Illes Balears, onde’l paru baxó un 8,30 por cientu, y Aragón, con una mengua del 5,43 por cientu. Nel lláu contrariu ta Ceuta, con una medra del 8,93 por cientu, y Melilla, con una xuba del 0,80 por cientu.
 
Si miramos la tasa interañal, el paru creció n’Asturies nos 12 meses últimos en 3.784 persones, lo que supón un aumentu del 4,77 por cientu. Si miramos estes variaciones relatives nel conxuntu del Estáu, el descensu mayor dase en Canaria, onde’l desemplegu baxó un 4,35 por cientu, mentes que’l territoriu onde más creció foi Euskadi, con un 14,42 por cientu.
 
A nivel estatal, 4.189.659 persones permanecen en paru pese a la baxada de 79.701 desemplegaos de mayu, lo que supón un descensu porcentual del 1,87 por cientu sobre'l mes d'abril. D'esta manera, rexístrase la segunda cayida del desemplegu dende avientu del 2010, cuando baxó en 10.221 persones.