El Gobiernu yá cuenta col borrador de restos y buelgues de la Guerra Civil y la dictadura franquista

Un total de 89 elementos tán rexistraos nel borrador de restos y buelgues de la Guerra Civil y la dictadura franquista ellaboráu pol Gobiernu. Ésti ye’l primer pasu, en cumplimientu de la Llei de Memoria Histórica, p’afitar les recomendaciones d’actuación sobre los mesmos, esto ye, la so retirada o señalización afayadiza.

En dalgunos casos –la mayoría al haber una gran cantidá de rótulos de cais nel catálogu– va afalase a los conceyos la retirada d’estes buelgues, anque n’otros podría decidise conservalos con una señalización afayadiza sobre la so naturaleza. D’esta forma, nos símbolos allugaos n'inmuebles declaraos Bien d'Interés Cultural (BIC) tendrá d'analizase'l so significáu históricu y arquiteutónicu, el so valor artísticu y el riesgu que podría suponer la so retirada pa la estabilidá de la construcción.

“Dada l'amplia casuística nun ye posible establecer criterios xenéricos y, en función de la llocalización, dellos símbolos podríen quedar nos sos allugamientos actuales debidamente señalizaos”, esplicó'l conseyeru de Presidencia y Participación Ciudadana, Guillermo Martínez Suárez, que presidió ayeri la xunta de la comisión d'espertos en memoria histórica. Nella presentóse’l borrador, que se divide n’once categoríes: rótulos de cais; plaques de viviendes; relieves, grabaos, inscripciones y grandes lletreros de la obra sindical del hogar y similares; otres plaques y elementos arquitectónicos pal cultu a los mártires y cayíos; cruces; vítor o víctor; escudos; escudu donativu premiu a la natalidá 1952 y grafitis de les celdes de los xulgaos, dambos casos en Cangas; cuadros de cargos públicos del franquismu; y designaciones de fíos adoptivos o predilectos y concesión de medayes, amás de contemplase la posibilidá d'incluyir un epígrafe nuevu pa elementos defensivos construyíos mientres el conflictu bélicu.

Treslláu a una web

Martínez Suárez esplicó tamién que'l Gobiernu estudia la posibilidá de contratar la ellaboración d'una base de datos y sistematizar tola información, cola mira de treslladala a una web interactiva y d'accesu abiertu. D'esta miente, cualquier persona interesada podría consultar los distintos símbolos, el so allugamientu y tipoloxía, amás de visualizalos n'imáxenes.

“La idea ye que la páxina se convierta nuna referencia sobre la simboloxía de la dictadura qu'entá permanez n'Asturies y que pueda actualizase de cutio nel casu de que s'alcuentren restos nuevos”, detalló’l conseyeru. Asturies ye una de les siete comunidaes autónomes que cuenten con un órganu asesor nel ámbitu de la memoria histórica, na que tán representaes les conseyeríes de Presidencia y Participación Ciudadana y Educación y Cultura, la Federación Asturiana de Conceyos, l'Archivu Históricu d'Asturies y la Universidá d'Uviéu.