Constitúyese una comisión d’espertos pa entainar nel cumplimientu de la Llei de Memoria Histórica

El Gobiernu creó esti llunes una comisión d’espertos cola fin de crear un catálogu de restos de la Guerra Civil y la dictadura pa entainar nel cumplimientu de la Llei de Memoria Histórica. Nél participa la Federación Asturiana de Conceyos, l’Archivu Históricu y la Universidá d’Uviéu, amás del propiu Executivu.

Guillermo Martínez, conseyeru de Presidencia y Participación Ciudadana, preside esti órganu compuestu por la direutora xeneral de Xusticia y Interior, Concepción Iglesias; la direutora xeneral de Patrimoniu Cultural, Otilia Requejo; la direutora del Archivu Históricu d’Asturies, Concepción Paredes; l’alcalde de Siero, Ángel García, en representación de la Federación Asturiana de Conceyos (FACC); y María del Carmen García, en representación de la Universidá d’Uviéu. “La nuestra voluntá ye ponenos a disposición de les víctimes y de los sos familiares pa, na midida de les nuestres posibilidaes, tratar de reparar el dolor causáu pola represión con aiciones como la catalogación de los símbolos franquistes y de la Guerra Civil y l’actualización de los mapes de foses comunes”, esplicó’l titular de Presidencia.

Martínez señaló que’l Gobiernu dispon yá d’una primer llista de símbolos, monumentos, plaques, insinies y evocaciones de la Guerra Civil y el periodu franquista correspondientes a 23 conceyos. Esa llista, que naz d’un primer contautu de la Direición Xeneral de Xusticia y Interior fecha n’avientu colos conceyos pa solicitar la so collaboración na llocalización de los símbolos mentaos, va valir de base pa la ellaboración del catálogu de restos que, desque tea rematáu, va dexar facer recomendaciones y propuestes d’actuación en tol país.

Otros 28 conceyos, mentes, comunicaron que nun-yos consta la esistencia d’insinies, plaques o oxetos afectaos pola Llei de Memoria Histórica nos sos territorios.

Clasificación por categoríes

La comisión creada güei va clasificar los restos en delles categoríes: denominaciones de cais, símbolos singulares como escudos oficiales, plaques y elementos arquiteutónicos de cultu y designaciones de fíos adoptivos o predilectos, ente otres. La información disponible va ordenase según estos criterios y depués van empezar los trabayos pa la ellaboración del catálogu.

Esti organismu va encargase tamién d’impulsar les canales de participación y interlocución amañosos pa recoyer aportaciones de les asociaciones y coleutivos rellacionaos cola recuperación de la memoria histórica y les reconocencies a les víctimes de la Guerra Civil y el franquismu. De magar empezó la llexislatura yá se dieron pasos nesti sentíu, cola designación d’una asesora téunica adscrita a Xusticia y Interior pa xestionar la Llei de Memoria Histórica y canalizar les demandes ciudadanes nesta materia, que va actuar tamién como secretaria de la comisión.