El Gobiernu saca alantre los Presupuestos Xenerales del Estáu

|
Pedro Sánchez y María Jesús Montero aprobación PXE 2022

El Congresu aprueba con 188 votos a favor les cuentes, lo que-y permitirá al presidente Pedro Sánchez escosar la llexislatura.

El Gobiernu de PSOE y Xuníes Podemos consiguió per segundu añu sacar alantre la llei de Presupuestos Xenerales del Estáu del 2022 al sumar 34 'sí' a los 154 diputaos d'entrambes formaciones. Son los 13 d'Esquerra Republicana de Catalunya-Sobiranistes, los 6 d'EAJ-PNV, los 5 d'EH Bildu, los 4 de PDeCat, los 2 de Más País-EQUO y los de Nueva Canarias, Més Compromís, Partido Regionalista de Cantabria (PRC) y Teruel Existe, los mesmos sofitos que l'añu pasáu.

Foro votó en contra de los PXE, mentes que'l BNG pasó d'oponese nel 2020 a l'astención, única na Cámara xunto cola diputada de VOX Patricia Rueda. El proyeutu va agora al Senáu pa continuar cola tramitación parllamentaria.

Reforma del Estatutu

Al aprobar les cuentes Sánchez asegura la posibilidá d'acabar la llexislatura, cuestión que ye clave de salir alantre n'Asturies la reforma del Estatutu d'Autonomía qu'incluya la oficialidá del asturianu y del gallego-asturiano, agora en negociación ente los grupos parllamentarios de FSA-PSOE, Podemos, Asturies pela Izquierda (IX-IAS) y Foro. Una vegada aprobada na Xunta Xeneral con trés quintos ha pasar peles Cortes, onde necesita una mayoría absoluta que nestos momentos podría dase.

Na imaxe, Sánchez y María Jesús Montero, ministra de Facienda y Función Pública, abrácense llueu de la votación ente aplausos de diputaos.

Contador Estadistiques