El Gobiernu reduz a nivel 1 d'alerta'l Plan de Contaminación Marina Accidental pola llegada de bolines de plásticu

Va caltenese l'operativu de vixilancia y recoyida d'estos elementos na costa con una ventena d'efeutivos asturianos baxo la coordinación del Serviciu d'Emerxencies.

El comité asesor del Plan Territorial por Contaminación Marina Accidental del Principáu d'Asturies (Placampa) recomendó esta mañana pasar a situación 1 d'alerta llueu d'analizar los datos de los díes últimos y determinar que la llegada de bolines de plásticu a Asturies procedentes d'una carga del barcu ‘Toconao’ perdida frente a la costa de Portugal ta estabilizada y los medios del Gobiernu son suficientes pa dicha vixilancia y recoyida. L'Executivu fixo darréu efeutiva esa baxada de la situación alerta y comunicóla al Ministeriu pa la Transición Ecolóxica y el Retu Demográficu, decisión que, na práutica, supón la retirada de los medios movilizaos pol Gobiernu del Estáu.

El trabayu de los venti efeutivos que van siguir cola mirada puesta na búsqueda d'estos plásticos va centrase nel 65 sableres consideraes prioritaries. Les bolines recoyíes entréguense al Seprona pal so rexistru y pa garantizar la trazabilidá y cadena de custodia de les muestes.

Amás, l'operativu de llimpieza retiró nestos díes cuasi 300 quilos d'otros plásticos marinos, material que se ta treslladando a Coxersa pa da-y el tratamientu afayadizu.

Na semeya, llimpieza de bolines de plásticu na sablera Penarronda (Castropol y Tapia).