170 persones trabayen na llimpieza y vixilancia de sableres énte la llegada de bolines de plásticu

El Comité Asesor del Plan Territorial por Contaminación Marina Accidental del Principáu d’Asturies (Placampa), activáu esti martes, aconceyó con representantes de los conceyos pa coordinar el dispositivu de vixilancia y llimpieza énte la llegada de bolines de plásticu a la mariña. Nél trabayen nestos momentos unes 170 persones.

La perda de contenedores del barcu ‘Toconao’, que cubría la ruta Algeciras-Rotterdam, el 8 d’avientu frente a la costa portuguesa, provocó la contaminación del mar con más de 25 millones de boles de plásticu. Col pasu de los díes, les corrientes averaron los sacos, munchos rotos, hasta la costa, llegando inclusive a Asturies.

Foi por esti motivu pol qu’ayeri’l Gobiernu activó’l nivel d’alerta 2 del Placampa, lo que permite la incorporación de medios del Ministeriu pa la Transición Ecolóxica y el Retu Demográficu al dispositivu de retirada y xestión de los residuos que l’Executivu punxo en marcha en coordinación con los ayuntamientos al traviés de la Federación Asturiana de Conceyos (FACC). D’esta forma, seis brigaes formaes por unes trenta persones incorpórense a unes llaborese vixilancia y llimpieza na que participen 170 persones, informó esta mañana la Conseyería de Fomentu, Cooperación Llocal y Prevención de Quemes.

El protocolu del Placampa identificó 65 de les 210 sableres asturianes como prioritaries y les brigaes de llimpieza actuarán a lo llargo del día en 20. Delia Alonso, delegada del Gobiernu estatal n’Asturies, apuntaba ayeri que se diba actuar en playes de Castropol, Tapia, Navia, Valdés, Castrillón, Villaviciosa y Llanes.

Otra manera, el conseyeru Alejandro Calvo declaró güei que tamién se ta trabayando coles organizaciones conservacionistes y les agrupaciones de Proteición Civil pa coordinar toles iniciatives de collaboración ciudadana de forma ordenada, cola fin de garantizar una correcta recoyida y xestión de les bolines.

Na semeya, llimpieza de bolines de plásticu ayeri na sablera Penarronda (Castropol y Tapia).