El Gobiernu amplía a un 50 por cientu l’aforu nel interior de los chigres

Al nun poder afitar el criteriu de distancia de seguridá en llugar del d’aforu, como pidiera al Executivu estatal, el Gobiernu asturianu decidió ampliar al 50 por cientu la capacidá d’usu nel interior de los chigres nesti puntu de la desescalada. D’esta forma pretende favorecer al sector teniendo en cuenta les peculiaridaes asturianes.

La entrada na fase 2, na que’l país entró ayeri, permite abrir l’interior de los chigres con una restricción del 40 por cientu d’aforu. Nun Conseyu de Gobiernu estraordinariu celebráu pela tarde, Asturies decidía flexibilizar la norma y xubir la capacidá disponible p’atender a los veceros a un 50 por cientu.

La decisión tómase a partir d’un informe de la Direición Xeneral de Salú Pública, a pidimientu de la Viceconseyería de Turismu, que xulga posible la modificación del porcentaxe d’aforu dende’l puntu de vista epidemiolóxicu, siempre que se tengan en cuenta, de forma estricta, les midíes de proteición y prevención prescrites poles autoridaes sanitaries. La midida entra en vigor güei.

Na semeya, el xixonés Café Trisquel ayeri na apertura del llocal nuevu, asitiáu a pocos metros del anterior.