El Congresu prorroga l’estáu d’alarma hasta’l 7 de xunu mientres Asturies prepara’l pasu a fase 2

El Gobiernu de coalición de PSOE y Xuníes Podemos consiguió’l preste del Congresu pa prorrogar per quinta vez l’estáu d’alarma y caltener les restricciones de movimientu ente provincies hasta’l 7 de xunu. El llunes Asturies pretende pasar la fase 2 de la desescalada ensin franxes horaries y con cambios pa favorecer a los chigres.

Esta ocasión foi na que l’Executivu algamó menos apoyos, un total de 177. Ciudadanos, EAJ-PNV, Más País, Coalición Canaria, PRC y Teruel Existe son los partíos que sofitaron la prórroga.

El PP, per primer vegada, votó en contra, mientres que caltuvieron la so posición el diputáu de Foro Isidro Martínez Oblanca –de manera telemática al tar pasando la COVID-19 nel so llar–, VOX, Junts per Catalunya, CUP y ERC, a esceición del representante de Sobiranistes, que s’astuvo. Tamién optó pola astención EH Bildu, qu’ayeri robló un alcuerdu xunto col PSOE y Xuníes Podemos pa derogar al completu la reforma llaboral pa compremeter a los vascos a refugar el ‘non’, rectificada a última hora de la xornada polos socialistes pa eliminar la pallabra “íntegra”.

Pidimientos d’Asturies

El Gobiernu asturianu yá solicitó al estatal el pasu del país a la fase 2 esti llunes, siguiendo’l calendariu de desescalada marcáu. Ente los pidimientos que fixo Asturies tán la eliminación de les franxes horaries y les restricciones de distancies, que nos chigres haya un criteriu de distancia en llugar d’aforu “poles especifidaes d’Asturies nesti tipu de negocios, de dimenesiones pequeñes habitualmente”, y que se llevante suspensión de los plazos alministrativos.