El Festival Internacional de la Gaita (FIG) torna cola presencia de John McSherry en Villaviciosa y el realcuentru de DRD

Llueu de dos años de DesconFIGnamientu por fin pue celebrase’l Festival Internacional de la Gaita (FIG), que celebra’l so decimoquintu aniversariu. Dende esti xueves y hasta’l domingu la música garra protagonismu en Villaviciosa con dos cites principales: el realcuentru de DRD y la presencia n’Asturies de John McSherry.

La pandemia de COVID-19 obligó a la Banda de Gaites Villaviciosa-El Gaitero a inventar un formatu nuevu adaptáu a los circunstancies. Nacía asina DesconFIGnamientu, con conciertos de bandes como N’Arba, Cerezal, La Bonturné, Felpeyu o Algaire nel Teatro Riera, amás d’incluyir la celebración del Certame de Canción Asturiana Xavi Solares o del Concursu de Gaiteros Memorial José Huerta al aire llibre, ente otres actividaes como charres o talleres.

Esti añu, dau l’ameyoramientu de la situación sanitaria, recuperáse’l FIG con mercáu, muncha actividá de cai y eventos más multitudinarios. Los conciertos, sicasí, nun van celebrase en carpa con gran escenariu y van caltenese nel Riera, con entrada llibre.

El primeru va tener llugar esta nueche a les 22 hores y va ser mui especial. Rubén Bada, Dolfu Fernández y Borja Baragaño tornen a xuntase pa recuperar el proyeutu de folk de cámara DRD llueu d’un llustru de parón.

El sábadu, mentes, a la mesma hora, va tener llugar la cita más importante de la edición. Trátase de la presencia de John McSherry, gaiteru y flautista irlandés fundador de Lúnasa y agora involucráu nel proyeutu The Olllam, ún de los grandes músicos de la escena folk internacional, qu’apuerta a Villaviciosa con un formatu tríu gracies al importante esfuerciu fechu pola organización de FIG pa facer realidá esta actuación.

Xuntu a McSherry van tar nel Riera al low whistle, uillean pipes (gaita irlandesa) y bodhran Francis McIlduff, compañeru nos grupos At first Light y Francis McIlduff Band, y a la guitarra acústica y voz Brendan Quinn, que ta a piques d'asoleyar lo que va ser el so proyeutu en solitariu del que ya ta disponible el single ‘The Journey Home’.

Mercáu na plaza Caveda y Nava

EL FIG va principiar esta tarde a les 20 hores na Casa de los Hevia cola charra-alderique ‘La gaita n’Asturies: del Gaiteru de Lliberdón al Conservatoriu’, con Rodrigo Joglar como ponente, actividá pa la que ye necesario inscribise previu pagu de 3 euros. A les 22 hores va tener llugar el conciertu de baldre de DRD pa llueu siguir la folixa con un sesión d’improvisación folk nel Pub El Trasgu.

L’apertura del mercáu del FIG, que s’asitia na plaza Caveda y Nava, va tener llugar mañana a les 17 hores. El mesmu va acoyer l’actuación de La Banda… Latira! col so folk astur-bretón a les 19 hores.

La xornada complétase cola VI Nueche en Danza del FIG, a les 22 hores na plaza d’abastos, con Los Xeitosos, Pandereteres de Fitoria y la Orquestina La Xarangana. Llueu va haber escenariu llibre p’allargar la fiesta.

Pelayo Fernández va poner el sábadu un taller de baldre d’afinación y puesta a puntu de gaita asturiana a les 10 hores nel Centru Cultural San Xuan de Capistrano, pa lo que ye necesario inscripción previa, y el FIG va xuntase cola Fiesta la Sidra de Villaviciosa al meudía n’El Güevu pa vivir un ambiente espectacular na villa. Pela tarde va ser el turnu de les bandes de gaites, con pasucais a les 17 hores y l’Alcuentru de Bandes de Gaites del FIG na plaza de la Casa de los Hevia a les 18 hores cola participación de los Veteranos de la Banda de Gaites Villaviciosa-El Gaitero, la Banda Gaites El Gumial, la Banda Gaites Xácara, la Banda Gaites Llariegu y la Banda de Gaites Villaviciosa-El Gaitero, pa finar el día col esperáu conciertu de McSherry de baldre nel Riera.

Bandines, canción asturiana y concursu de gaiteros

El domingu l’activida nel festival nun apara y a les 11.30 hores na Casa los Hevia va poner Daniel García de la Cuesta la charra ‘Gaites y dances n’Asturies dende’l sieglu XII’, pa lo que tamién ye necesario facer una inscripción previa de 3 euros. Al meudía La Garrapiella, Los Gascones y les bandines de la Banda de Gaites Villaviciosa-El Gaitero van animar los chigres de Villaviciosa.

Pela tarde ta programada la celebración dende les 17 hores na plaza de la Casa los Hevia del III Certame de Canción Asturiana Xavi Solares cola participación de Jorge Tuya, Liliana Castañón, y Luisi Martínez Suárez y José García, que van interpretar tamién asturianada dialogada, y l’acompañamientu a la gaita de Valentín Fuente. Va poner el ramu al FIG a les 19 hores nel Riera XII Concursu de Gaiteros y Gaiteres Memorial José Huerta.

Na semeya, McIlduff, McSherry y Quinn.