El festival DesconFiGnamientu animó Villaviciosa

El conciertu de Felpeyu y Algaire del sábadu dexó pequeñu'l Teatru Riera.

Del xueves a ayeri celebróse en Villaviciosa'l DesconFIGnamientu Festival 2.0, certame que vieno a cubrir el Festival Internacional de la Gaita (FIG) hasta la recuperación de la normalidá qu'arrincó la COVID-19. Conciertos, bandines, conferencies y el Certame de Canción Asturiana Xavi Solares y el XI Concursu de Gaiteros Memorial José Huerta conformaron el programa d'esta iniciativa de la Banda de Gaites Villaviciosa-El Gaitero.

La Bonturné abrió les actuaciones, que tuvieron como sede el Riera. El vienres siguieron Alberto Jambrina y Pablo Madrid, y el sábadu tocaron Algaire y Felpeyu, qu'escosaron entraes. Amás, rescamplaron estos díes el taller 'Empayueláu prácticu de gaita asturiana' de Pelayo Fernández y la charra 'Músicos nel pórticu la ilesia de Santa María de la Oliva' de Dani García de la Cuesta.

El domingu zarróse l'actividá col Certame de Canción Asturiana Xavi Solares, na parte d'atrás de la Casa de los Hevia, y el XI Concursu de Gaiteros Memorial José Huerta. Paula Gutiérrez Montes foi la ganadora per segundu añu siguíu, mentes qu'en menores de 15 años el vencedor foi Nel Cortizo.