El Día Internacional de los Museos celébrase con actividaes n'asturianu

|
Muséu de la Historia Urbana d'Avilés

Avilés asoleya un videu y Xixón entama una actividá de microrrellatos billingüe.

Esti llunes, 18 de mayu, celébrase'l Día Internacional de los Museos. Son munches les actividaes, virtuales toes por mor de la crisis sanitaria pola pandemia de COVID-10 a la espera de que vayan abriendo les sos puertes, como van facer los d'Avilés mañana con tolos protocolos de seguranza o'l Muséu de Belles Artes esti xueves, les que se tán desendolcando estes xornaes pa celebrar esta fecha impulsada pol Conseyu Internacional de Museos dende'l 1977, esti añu baxo'l lema 'Museos pola igualdá: diversidá y inclusión'.

Ente elles hai delles n'asturianu. N'Avilés la Estaya de la Llingua va asoleyar un vidiu a les 17 hores en collaboración col Muséu de la Historia Urbana entituláu 'Avilés ye un muséu', un percorríu virtual per esta instalación y per otros sitios de la ciudá, que se va emitir na web del Conceyu y nes sos redes sociales, na páxina del SNL, na revista dixital de la Fundación municipal de Cultura y na plataforma dixital PlayPresta.

Mentes, en Xixón, la Rede Municipal de Museos entama 'MuseoRelatos'. Trátase d'una actividá lliteraria en castallanu y n'asturianu de testos de non más de 185 pallabres nel que'l protagonismu o'l puntu d'inspiración van ser un conxuntu de pieces de los museos llocales escoyíes pa la ocasión que se pueden consultar nes bases incluyíes al final noticia como documentu adxuntu, con plazu d'entrega hasta'l miércoles.

Na semeya, fachada del Muséu de la Historia Urbana d'Avilés.

AdxuntuTamañu
PDF icon Bases de 'MuseoRelatos'874.2 KB
Contador Estadistiques