Les Fuercies Armaes van celebrar el so día n'Asturies el 25 de Mayu –coincidiendo cola declaración de soberanía asturiana y la creación de la bandera d'Asturies– con desfiles y un homenaxe a la bandera española
Los reis van presidir l'actu central con un desfile terrestre n'Uviéu, y Xixón va acoyer el víspere una revista naval y un desfile aéreu. L'actu na capital d'Asturies va consistir nun homenaxe a la bandera española y a los cayíos y nun desfile terrestre.
Un homenaxe a la bandera española y un desfile n'Uviéu
El Día de les Fuercies Armaes ye un alcuentru añal que busca allegar a los militares a la sociedá de la que faen parte y na que se faen exhibiciones y desfiles militares.
Según l'anuncia fecha por Ministeriu de Defensa, Asturies ye una "tierra acoyedora y mui venceyada a les Fuercies Armaes" y que siempre " amosó muncho cariñu a los sos miembros, que gozen de gran popularidá".
La celebración del Día de les Fuercies Armaes entama en 1978 cuando s'estableció facer un actu institucional que sirviera d'homenaxe a los Exércitos y la Armada, asina como la UME, pa fomentar el conocimientu y la so integración na sociedá.
La fecha prevista en 2024 yera'l 1 de xunu, pero ta acabante anunciase'l cambiu pal 25 de mayu
El DIFAS celébrase tradicionalmente'l sábadu coincidente o más cercanu al 30 de mayu, festividá de San Fernando, y nos últimos años l'actu celébrase en distintos llugares del estáu.
La fecha prevista en 2024 yera'l 1 de xunu, como s'anunció nel mes d'avientu de 2023, pero esta selmana'l Ministeriu de Defensa comunicó que diba celebrase una selmana primero, el 25 de mayu, coincidiendo col Día de la Bandera Asturiana.
L'actu eclipsa'l Día de la Bandera Asturiana y la declaración de soberanía de la Xunta Xeneral
El 25 de Mayu foi propuestu na Transición como Día d'Asturies por fuercies democrátiques, asturianistes y d'izquierda pol so simbolismu venceyáu a la declaración de soberanía de la Xunta Xeneral, la creación de la bandera asturiana y la declaración de guerra d'Asturies a Napoleón.
Adrián Barbón yá en 2022 referíase'l 25 de mayu como 'Día de la Bandera' y el 2023 el so gobiernu dio puxu a esta celebración, yá oficialmente con dellos actos institucionales de reivindicación asturianista y la ellaboración de materiales.
L'afitamientu del Día de la Bandera y la soberanía pue quedar tapecíu pol homenaxe a la bandera española
Sicasí en 2024, el protagonismu del 25 de Mayu n'Asturies va llevalu les Fuercies Armaes, que faen coincidir fecha y llugar, y lo que diba ser probablemente l'afitamientu del Día de la Bandera Asturiana va quedar tapecíu polos actos d'exaltación de les Fuerces Armaes, la bandera española y la monarquía.
