El Conseyu Asesor va contar con una comisión permanente formada por 5 miembros y Piñán

|
Conseyu Asesor de Política Llingüística reducida

Esti xueves echó a andar el Conseyu Asesor de Política Llingüística del Gobiernu, presidíu por Berta Piñán, que nun ocultó la so emoción pola constitución d’esti órganu. La Conseyera de Cultura, Política Llingüística y Turismu va tar al frente d’una comisión permanente de 5 miembros que va tener una función coordinadora.

Por vía telemática, dada la situación sanitaria pola COVID-19, aconceyaron ayeri los 32 miembros que formen parte del Conseyu Asesor de Política Llingüística, que cuenta con Piñán como presidenta; con Antón García, direutor xeneral de Política Llingüística, como vicepresidente; y con Irene Arce, xefa del Serviciu de Normalización de la conseyería, como secretaria. Completen la so composición los representantes de l’Academia de la Llingua Asturiana (ayeri’l so secretariu Xosé Ramón Iglesias Cueva), de la Universidá d’Uviéu (el rector Santiago García Granda), el RIDEA (la presidenta de la ‘Comisión Primera: Lingüística, literatura y tradiciones’ y direutora del Boletín de Humanidades y Ciencias Sociales, Marta Pérez Toral) y RTPA (el direutor xeneral Francisco González Orejas) y 25 persones de dellos ámbitos escoyíos por Piñán.

La sesión constituyente sirvió básicamente de presentación y treslláu a los participantes del reglamentu. La conseyera nun pudo ocultar la so emoción pola puesta en marcha del Conseyu Asesor, espresando’l so deséu de que valiera pa trabayar y p’algamar avances en política llingüística.

Tamién apuntó la conformación d’una comisión permanente que va tar presidida por ella mesma –sustituyiríala Antón García en casu d’ausencia– y formada por 5 miembros. Ayeri treslladóse la invitación a cinco conseyeros, de los que dos confirmaron la so participación, Víctor Suárez y el representante de l’Academia de la Llingua Asturiana, mentes que los otres trés retrasaron la so respuesta pa valorar la compatibilidá d’esti llabor coles sos responsabilidaes diaries.

Otra manera, va ponese a disposición de tolos participantes una direición de corréu electrónicu pa la presentación de propuestes de meses sectoriales pa los meses vinientes. La resolución del BOPA pa la creación del Conseyu Asesor afita que’l Plenu del mesmu va aconceyar, polo menos, una vegada cada seis meses.

Na imaxe, una captura d'un momentu de la sesión constitutiva del Conseyu Asesor de Política Llinguística, con Piñán nel cuadru inferior derechu.

Contador Estadistiques