El concursu ‘Xixón Fala en 3’ ábrese a moces y mozos d'ente 14 y 18 años

El Conceyu de Xixón ta acabante de convocar la segunda edición del concursu ‘Xixón Fala en 3’ depués de la importante participación del 2018. La iniciativa, qu’estimula l’usu del asturianu nun rexistru cultu pa falar de temátiques de cualesquier calter, estrena categoría pa mozos de 14 a 18 años y caltién les orixinales p’adultos.

Pablo Martínez Testa, con 'Ente lo animal y lo humano', resultó vencedor na estaya de Cultura Asturiana, mentes que Claudia Gutiérrez Lueje, con 'Esquí de monte', fíxilo na de Divulgación tres esponer en trés minutos xustos el so tema a tratar énte’l públicu presente nel salón d’actos de la Escuela de Comerciu de Xixón. Nesta ocasión, les comunicaciones treslládense al del Centru de Cultura Antiguu Institutu, nuna cita prevista pal 14 d’avientu a les 11 hores.

“Esti concursu ofrez a la ciudadanía una ocasión única pa perfeicionar les sos aptitúes de comunicación n’asturianu, pa emplegar l’asturianu en cualesquier estaya y rexistru y pa participar nun eventu col que van algamase cotes altes de prestixu y normalización en tola comunidá asturfalante”, espliquen dende la Oficina de Normalización Llingüística de Xixón. “No que cinca al públicu, ye una perbona manera d’abrir mires y d’averase a un conocimientu, anque seya esbozáu, de temes mui estremaos”, añaden.

Na estaya de cultura y realidá asturiana van poder tratase temes d’antropoloxía, toponimia, baille, historia, sociollingüística, reconversión industrial, nueves formes de turismu y perspeutives de futuru, ente otros. Mentes, nos de divulgación, non necesariamente sobre Asturies, entren asuntos tan variaos como podría ser la “vida intelixente n’otros planetes, homeopatía y pseudociencia, crianza con apegu, enerxíes renovables y cambiu climáticu, etc.”.

Primer premiu de 600 euros

Amás, estrénase la tercer categoría, destinada a moces y mozos d’ente 14 y 18 años, que pueden presentar temes tanto de cultura y realidá asturiana como de divulgación. La entrada d’esta estaya rebaxa los premios, que l’añu pasáu yeren de 900 euros pal ganador: agora son de 600 en caúna de les trés, recibiendo’l segundu clasificáu 275 y el terceru, 125.

La xente interesao en participar nesta segunda edición de ‘Xixón Fala en 3’ han de presentar la solicitú, formalizada d’alcuerdu con esti formulariu, nel Rexistru Electrónicu operativu les 24 hores del día, nel Rexistru de la Fundación Municipal de Cultura, Educación y Universidá Popular o na Rede Municipal d’Oficines d’Atención a la Ciudadanía del Conceyu de Xixón, amás de nos sitios de procedimientu alministrativu común de les alministraciones públiques, enantes del 5 d’avientu.

Na imaxe, un momentu de la intervención de Laura Marcos na edición pasada. Semeya obra d'Inaciu Galán.