Abierta la inscripción pal III 'Xixón Fala en 3'

Caltiénense les categoríes y los premios. La final, prevista'l 20 de febreru, será presencial si la situación epidemiolóxica lo permite.

El 'Xixon Fala en 3', concursu qu'entama la Oficina de Normalización Llingüística de Xixón pa fomentar l’usu del asturianu pa tratar cualesquier temática, encara la so tercer edición. Hasta'l 14 de febreru tán abiertes les inscripciones pa esta inicitiva que repetirá nel Centru de Cultura Antiguu Institutu.

A les 11 hores del 20 de febreru, xornada previa al Día Internacional de la Llingua Materna, los participantes van defender en 3 minutos xustos el so tema a tratar. Ha de ser “d’una manera clara y concisa”, emplegando un rexistru cultu.

Al igual que l'añu pasáu, la categoría A correspuende a la Cultura y Realidá asturiana, onde van poder tratase temes d’antropoloxía, toponimia, baille, historia o sociollingüística, ente otros, mentes que na B compiten los concursantes que presenten temes de divulgación non necesariamente venceyaos a Asturies. La C ye un amiestu de les dos anteriores destinada pa moces y mozos de 14 a 18 años.

El ganador de caúna de les trés estayes va recibir 600 euros de recompensa, mentes que la de los segundos y terceros van llevar 275 y 125, de manera respeutiva. Na edición pasada, celebrada n’avientu del 2019, el vencederor na categoría A foi Inaciu Galán con ‘L’asturianu nel franquismu: Amigos del Bable’; Marcos Antonio Álvarez Costales na B con ‘Privacidá n’Internet’; y Celia Corrales na C con 'Salú mental: la importancia de lo invisible’.

Inscripciones

La xente interesao en concursar na tercer edición de ‘Xixón Fala en 3’ tien hasta’l 14 de febreru pa presentar la solicitú, formalizada d’alcuerdu con esti formulariu, nel Rexistru Electrónicu operativu les 24 hores del día, nel Rexistru de la Fundación Municipal de Cultura, Educación y Universidá Popular o na Rede Municipal d’Oficines d’Atención a la Ciudadanía del Conceyu de Xixón, amás de nos sitios de procedimientu alministrativu común de les alministraciones públiques. Mentes, los que quieran acudir como públicu yá pueden acutar plaza al traviés del corréu electrónicu llinguaasturiana@xixon.es.

Nel casu de que la situación sanitaria del momentu impidiera un 'Xixón Fala en 3' presencia, la competición desendolcaríase de manera virtual.

Na semeya, ganadores y xuráu de la segunda edición del concursu, celebrada n'avientu del 2019.