El Colláu Fancuaya y Les Praeres dieron espectáculu a La Vuelta

Les dos etapes asturianes de La Vuelta nun defraudaron. El belga Remco Evenepoel (Quick-Step Alpha Vinyl) salió como líder de La Pola Llaviana y reforció la so posición de cara a les dos selmanes próximes llueu de los finales nel Colláu Fancuaya, onde ganó l’australianu Jay Vine (Alpecin-Deceuninck), y en Les Praeres, con trunfu del surafricanu Louis Meintjes (Intermarche-Wanty-Gobert Materiaux).

El bon tiempu ayudó a enllenar de públicu les carreteres estes dos xornaes, con especial afluencia nos dos altos que facíen final d’etapa y la mirada puesta nel asitiáu en Yernes y Tameza, que se descubría’l sábadu pa ciclismu internacional. Les Praeres, yá conocíu pol so debut en La Vuelta nel 2018, la gran parede d’esta edición de la carrera, dexó tamién imáxenes espectaculares con Evenepoel nun estáu de forma grande.

El belga salió reforció de cara a les dos selmanes que queden de carrera, ampliando diferencies con tolos sos rivales, especialmente con Primož Roglič (Jumbo-Visma), ganador de les trés ediciones últimes. Un minutu y un segundu tenía de ventaya’l del Quick-Step na salida en La Pola Llaviana, que s’amplió a 1.53 en Les Praeres, col eslovenu pasando de la cuarta a la tercera posición.

Col segundu clasificáu, Enric Mas (Movistar), Evenepoel cuenta con una ventaya de 1.12. Enantes tenía 28 segundos de marxe.

El xixonés nacíu en Salamanca, Dani Navarro (Burgos-BH), únicu ciclista asturianu en carrera, ocupa la posición 68, a 55.52 del líder. Tuvo’l so meyor día en Les Praeres, onde llegó’l 27 a 5.01 de Meintjes.

Na imaxe, Meintjes na so xuba en solitariu hacia la meta de Les Praeres. Semeya d'Asturies.com.