El Colláu Fancuaya estrénase en La Vuelta

Les Praeres repite y conviértese na ascensión más dura d'esta edición de la carrera, qu'esti añu pasa per Asturies na so primer semana.

El Colláu Fancuaya incorpórase al llistáu de xubíes asturianes que s'estrenen pal ciclismu profesional en La Vuelta. Esta cume, asitiada en Yernes y Tameza, y de gran dureza, va ser final mañana d'una xornada de 153,4 quilómentros que va tener salida de La Pola Llaviana y que va pasar per La Collaona y La Mozqueta, al entamu, y otros trés puertos de tercera a continuación.

Al día siguiente, una d'eses ascensiones descubiertes pa esta carrera ciclista, Les Praeres, que debutó na edición del 2018 con victoria del inglés Simon Yates, vuelve per segunda vegada al llibru de ruta. Va ser nuna etapa de 171,4 quilómetros con comienzu en Villaviciosa y pasu pel Altu del Tornu, El Fitu y dos tercer categoría enantes d'afrontar la gran parede d'esta edición de la carrera ciclista.

A diferencia d'años anteriores, el pelotón pasa per Asturies na primer selmana, lo que nun quita que sía decisiva pa marcar diferencies na xeneral de cara a les dos siguientes.

Respetu de la toponimia

Per segundu añu La Vuelta torna a respetar la toponimia tradicional, única oficial. Ésta nun se cumple namái colo nomes de la mayoría de los puertos de monte, al nun principiar entovía'l so procesu de recuperación, una cuestión na que yá ta trabayando la Conseyería de Cultura, Política Llingüística y Turismu al constituyir en xunu la Comisión Especializada de Toponimia Xeográfica.