Dixebra torna a Tribeca pa dar un conciertu de la xira ‘Ente la niebla’ en feches navidiegues

En Tribeca arrancó la xira ‘Ente la niebla’ cola presentación del discu-llibru que-y da nome y esti mes Dixebra va tornar a la sala uvieína pa ufrir un conciertu. Una manera cola que banda vien celebrando’l fin d’añu a empar que da la oportunidá d’acudir a un direuto a los muchos siguidores que viven fuera y tornen a casa nestes fiestes.

Va ser el sábadu 23, a les 20 hores, cuando los miembros de la banda avilesina van xubir al escenariu pa interpretar temes d’esti trabayu conceptual sobre la historia del movimientu obreru asturianu asoleyáu n'abril del añu pasáu, amás de clásicos de la formación. El discu-llibru, del que se sacó una segunda edición, ta formáu por venti cortes y inclúi testos d'historiadores, periodistes, escritores o antropólogos que reflexonen sobre aspectos variaos de la historia de llucha del pueblu asturianu, y cuenta con un importante apartáu gráficu.

Con ‘Ente la niebla’ Dixebra “quier dexar constancia d'una historia que paga la pena conocer y ufiertar a les xeneraciones nueves tener accesu a ella”. La banda tocó en numberoses ocasiones dientro y fuera d’Asturies con ésitu nesti tiempu y el públicu cuenta agora cola oportunidá de ver la propuesta nuna sala, col ambiente especial que conlleva esti tipu d’espacios.

El preciu del conciertu ye de 12 euros, anticipada, y de 15 na puerta. Les entraes yá tán a la venta na plataforma woutick.es.