Disponibles les entraes pa la gala del XIII Premiu Camaretá al Meyor Cantar nel Niemeyer

Son de baldre, pero ye necesario retirales p'acceder a la final del sábadu 27.

Dende güei ye posible acutar asientu pa la gala del XIII Premiu Camaretá al Meyor Cantar nel Auditoriu del avilesín Centru Niemeyer. Nella los cuatro finalistes van defender los temes que pasaron el primer corte del xuráu: Carla Armas y Rubén García, con ‘El que conoz a tierra’ (lletra de García); L-R, con ‘Veis volver’ (lletra de Leticia González ‘Baselgas’); ¿Aú?, con ‘Tomasín’ (lletra de Ruma Barbero); y la Banda Gaites Camín de Fierro, con ‘Flacos y ensin peinar’ (lletra de Toli Morilla).

El ganador del añu pasáu, Rodrigo Cuevas con 'Rambalín', va ufrir una actuación nel momentu de les deliberaciones pa la escoyeta de los artistes merecedores de la recompensa de 6.000 euros, un troféu conmemorativu, la grabación d'un videoclip y promoción. L'entamu del eventu ta previstu pa les 22.15 hores y va emitise en direuto per TPA.

Pa facese coles entraes pa la gala hai qu'acceder a la web del Centru Niemeyer o acudir de manera presencial nel propiu Niemeyer, na Llaboral (Xixón) o nel Centru d'Información Turística del Principáu d'Asturies (Uviéu). Van entregase un máximo de 2 por persona.