'De Granada a Covadonga': asina se convierte'l Día de les Fuerces Armaes nun actu partidista

El Xefe de Estáu Mayor de la Defensa (JEMAD) tira de los tópicos del nacionalismu español pa xustificar n'Asturies unes actividaes que van tapecer la conmemoración de soberanía del 25 de mayu del 1808 y el Día de la Bandera Asturiana.

La presentación de los actos del Día de las Fuerzas Armadas, que tuvo llugar el vienres en Cabo Noval, cola presencia de los alcaldes d'Uviéu y Xixón, Alfredo Canteli y Carmen Moriyón, amosaron el calter propagandísiticu d'estos actos, non solo del exércitu español, sinon d'un conceptu de patriotismu qu'usa Asturies como supuestu orixe de la unidá española.

"L'añu pasáu celebráronse en Granada y esti añu vamos facelo equí, n'Uviéu y en Xixón, nos oríxenes de la España que tenemos anguaño, esa Asturies, y esos oríxenes, depués de siete sieglos de llucha llargos, zarráronse en Granada, polo que pesllamos una especie de círculu históricu que foi la Reconquista, que ta nel ADN de la nación española", espresó l'almirante xeneral Teodoro Esteban López Calderón.

Darréu refiriríase a Asturies como "una tierra que ye l'orixe de la España de güei". Ente'l 22 y el 25 de mayu van celebrase actividaes n'Uviéu y Xixón  cola participación de 6.000 militares.

La fecha prevista en 2024 yera'l 1 de xunu, como s'anunció nel mes d'avientu de 2023, pero'l Ministeriu de Defensa decidió hai unes selmanes celebralu una selmana primero, el 25 de mayu, coincidiendo col Día de la Bandera Asturiana.

L'actu eclipsa'l Día de la Bandera Asturiana y la declaración de soberanía de la Xunta Xeneral

El 25 de Mayu foi propuestu na Transición como Día d'Asturies por fuercies democrátiques, asturianistes y d'izquierda pol so simbolismu venceyáu a la declaración de soberanía de la Xunta Xeneral, la creación de la bandera asturiana y la declaración de guerra d'Asturies a Napoleón.

Adrián Barbón, yá en 2022, referíase'l 25 de mayu como 'Día de la Bandera' y el 2023 el so gobiernu dio puxu a esta celebración oficialmente con dellos actos institucionales de reivindicación asturianista y la ellaboración de materiales.

Na semeya, López Calderón ente Moriyón y Canteli.