Cúmplense 75 años del descubrimientu del horror d'Auschwitz

El 27 de xineru del 1945 les tropes soviétiques lliberaron el campu d'esterminiu nazi en territoriu polacu. Nun había víctimes asturianes, como sí hebo en Mauthausen.

Namái queden, por cuestión d'edá, dos centenares de sobrevivientes d'Auschwitz, un infiernu agora convertíu en muséu –el Państwowe Muzeum Auschwitz-Birkenau o Muséu Estatal d'Auschwitz-Birkenau– pa recordar la memoria de los 1,1 millones de persones, principalmente xudíos, que perdieron la so vida nél ente los años 1940 y 1945 y amosar los crímenes de guerra nazis. 1,3 millones pasaron pelos trés campos d'Oświęcim, nome polacu del llugar, pero sólo'l 10 por cientu d'ellos saldríen con vida d'ellí.

Munchos d'estos sobrevivientes vivos anguaños van tar presentes güei nel llugar pa participar esta tarde nos actos con motivu del 75 aniversariu de la lliberación del campu de concentración y esterminiu. Andrzej Duda, xefe d'Estáu polacu, va presidir l'actu nel que va haber presencia de presidentes y primeros ministros d'Alemania, Israel, Austria, Francia, Ucrania o Grecia, desplazándose dende España los monarques Felipe VI y Letizia.

N'Asturies ayeri tamién se celebró un actu, n'Uviéu, por cuenta del Día de la Memoria del Holocausto y la Prevención de Crímenes contra la Humanidá, col que Naciones Xuníes conmemora tolos 27 de xineru esta fecha dende l'añu 2006. "Nun mundu nel que por desgracia tenemos que tar vacunándonos permanenteme contra'l fanatismu ye importante recordar, y ye dalgo qu'estudié muncho mientres tola mio vida, cómo una idea fanática conviertése en réxime, destrúi una democracia y cómo dende'l poder asesina. Eso foi'l nazismu y nun lo podemos escaecer", aseguró'l presidente Adrián Barbón nel campu San Francisco en compañía del alcalde Alfredo Canteli y la delegada del Gobiernu estatal n'Asturies, Delia Losa.

Ensin republicanos

Auschwitz nun contó con presencia de republicanos, como sí hebo n'otros munchos campos de concentración, siendo'l más nomáu'l de Mathausen. Ellí perdieron la vida 91 asturianos, según un llistáu fechu públicu en branu pol Ministeriu de Xusticia.

Esta documentación tamién afita qu'otros 7 asturianos morrieron nos campos de Dachau, Hartheim, Bergen-Belsen, Buchenwald y Ravensbrück, onde tamién hebo presos políticos d'orixe español. Per Auschwit, campu de concentración dende 1940 al 1942, cuando pasó a ser d'esterminiu, pasaron un millón de xudíos, 150.000 polacos, 23.000 xitanos, 15.000 soviéticos y más 10.000 prisioneros d'otres nacionalidaes, arriendes de minoríes persiguíes como'l casu de los homosexuales.

Nel 2005, n'Asturies.com recordábamos tamién esta efeméride centrándonos nel testimoniu d'Angelina Andrada, la representante asturiana d'Amical Mauthausen, que nun disponía naquel momentu de medios pa desplazase a Mathausen, onde perdió al so padre, al cabudañu de la lliberación d'esti campu, el 5 de mayu, cita na que nunca faltaba. Pidía nesti mediu "una entrevista con representantes políticos asturianos", citando al delegáu del Gobiernu, a oxetu de solicitar una ayuda, y llamentó la "poca repercusión que tien la memoria de les víctimes de los campos de concentración na sociedá asturiana y nos sos representantes políticos".

"Otres comunidaes como la catalana lleven una gran representación institucional y de familiares y veteranos, con una bandera de Cataluña enorme mientres qu'equí yo voi sola con la nuestra bandera y da igual lo muncho que salgamos nos periódicos porque nun nos faen casu", aseguraba.

Semeya obra de Bibi595 baxo llicencia CC BY-SA 3.0.