91 asturianos morrieron nos campos de concentración nazis de Mauthausen y Gusen

El Ministeriu de Xusticia fixo públicu esti vienres el llistáu de les persones nacíos en territoriu español que morrieron nos campos de concentración nazis de Mauthausen y Gusen, un total de 4.427, pa que puedan ser inscritos como finaos. 91 d'ellos yeren asturianos, de los que 7 nun apaecen nos llibros esistentes.

Activu dende’l 1938 hasta la llegada de los aliaos nel 1945, Mauthausen foi un campu de concentración asitiáu n’Austria pol que pasaron unos 200.000 prisioneros, de los que 7.500 foron españoles. Al rodiu la metá d’ellos nun pudieron sobrevivir, como ye’l casu de los 4.427 ciudadanos d’orixe español que recueye la llista fecha pública pol Gobiernu estatal a partir de llibros allugaos nel Rexistru Civil Central y comprobaciones n’otres bases de datos.

Cerca de Mauthausen taba Gusen, otru campu dependiente del primeru, que tamién foi destín de munchos republicanos. Éstos empezaron a llegar nel 1940, la mayor parte de la Francia ocupada polos nazis, onde se desplazaron previamente escapando de la dictadura de Franco.

La llista espublizada incorpora los 4.427 nomes de los finaos, colos dos apellíos, fecha de nacimientu, llugar de nacencia y provincia, fecha de la muerte y campu onde ésta se produxo. D’ellos, 91 son asturianos, anque 7 d’ellos nun apaecen nos llibros nos que se basó esta investigación.

Na estaya última del llistáu, entitulada ‘No presentes libro’, tamién tán rexistraos otros 7 asturianos que morrieron nos campos de Dachau, Hartheim, Bergen-Belsen, Buchenwald y Ravensbrück. Inclusive hai una persona, l’uviedín Urbano Quintana Caba, del que nun se cuenta cola fecha de la so muerte nin el llugar onde se produxo.

Un mes pa presentar alegaciones

Los familiares y allegaos a les persones presentes nesta llista tienen un mes pa presentar alegaciones y correiciones. Nesi momentu van pasar a quedar inscritos como finaos nel Rexistru Civil Central, onde nun taben rexistraos.

D’esta forma cúmplese una de les iniciatives que recueye la Llei de Memoria Histórica pa la reparación de les víctimes del nazismu.

Na semeya, momentu de la lliberación del campu, con una pancarta colgada polos antifascistes españoles en castellanu, inglés y rusu salundando a les "fuercies lliberadores".