Cuatro actividaes conformen la programación de La Reciella de la Factoría nesti primer semestre

La Reciella de la Factoría, l’actividá qu’entama la Estaya de la Llingua d’Avilés y ‘Reciella. Families pol Asturianu’, yá tien zarráu’l programa pa esti primer semestre del añu. El Callejón del Gato va abrir el 9 de febreru’l ciclu con ‘La neña de les trences al revés’.

L’espectáculu de marionetes basáu nel cuentu de mesmu nome d’Iris Díaz Trancho foi un ésitu en Escenines pa la Reciella, festival navidiegu qu’esti coleutivu entama en Xixón, y agora va poder vese n’Avilés. Toles actividaes de La Reciella de la Factoría va celebrase nel espaciu escénicu de la Factoría Cultural (avenida de Portugal, 13) a les 19 hores, con entrada llibre hasta completar aforu y la imposibilidá d’entrar na sala una vegada comenzada la función.

La siguiente producción en representase va ser ‘Cuentos y llendes’ (23 de marzu), a cargu d’El Turnebís del Tribilín, compañía que fai teatru de solombres. El coru de la reciella del Conservatoriu Julián Orbón, dirixíu pola profesora Isabel Baigorri Saenz, va protagonizar la cita del 20 d’abril, mentes que’l 11 de mayu Olga Cuervo va poner el cuentacuentos ‘Valentina quier un pexe’.