Compromisu por Ḷḷena algama "un resultáu históricu" al sumar 4 conceyales y propón alcuerdos pa “un cambiu”

|
Compromisu por Ḷḷena celebración 28-M

1.190 votos y el 21,21 por cientu del total. Compromisu por Asturies (Conciyu Ḷḷena) algamó’l 28-M "un resultáu históricu" que-y da 4 conceyales y el puxu pa proponer al PSOE –segunda fuercia más votada– y PP “conversaciones pa un cambiu nel conciyu” al nun tener Convocatoria por Lena los 9 que da la mayoría absoluta.

La coalición que lidera Izquierda Xunida (IX), que fora xunto con Compromisu nel 2019 algamando 9 diputaos y gobernaren xuntos hasta retirar en marzu les competencies a los dos ediles asturianistes que contaben con elles, David Suárez ‘Cai’ y José Agripino Pérez Acebal –el terceru Carlos García Villamil, qu’entró en febreru, nun tenía–, ganó les eleiciones al consiguir 7 ediles. El PSOE y Compromisu, con Gelos López de candidata, llevaron 4 y el PP, 2, polo que sumaríen los 9 suficientes pa tener l’Alcaldía.

“IX autodescartóse de cualquier alcuerdu con nós y espulsónos. Y pa enriba faltónos al respetu con una declaración en prensa diciendo que fixo llimpieza n’IX, dalgo que nun vamos consentir”, esplica Pérez Acebal, que llama a alcuerdos. “P’articular esa mayoría proponemos al restu de partíos conversaciones pa un cambiu nel conciyu”, rescampla darréu, col programa eleutoral del partíu como base pa llegar a puntos d'alcuentru.

La intención de la FSA de proponer a Convocatoria por Asturies un alcuerdu nos conceyos pa dar les alcaldíes al partíu más votáu, como sería’l casu de Ḷḷena pa la coalición, frenaría’l movimientu de Compromisu. “Nós somos una candidatura llocal, nun dependemos de lo que digan n’Uviéu y miramos pal futuru del conceyu. Creemos que la meyor solución pa Ḷḷena ye un cambiu na Alcaldía”, polo que pide a les agrupaciones llocales del PSOE y PP “altor de mires; que valore lo que más interesa a los ḷḷenizos y a los sos propios votantes”.

Sobre quién garraría l’Alcaldía, Pérez Acebal asegura tar abiertu “a tolos escenarios posibles”. “Lo primero ye conocer les posiciones de los partíos y la so disponibilidá a un cambiu nel conciyu”, espresa.

Cuatro representantes

Compromisu va contar con cuatro representantes nesta llexislatura na Casa Conceyu. Son Gelos López, Cai, Pérez Acebal y Natalia Ahilagas, independiente procedente d'IX, al igual que la candidata a alcaldesa.

Na semeya, candidatos y militantes de Compromisu celebren el resultáu eleutoral del domingu.

Contador Estadistiques