Compromisu por Asturies (Conciyu Ḷḷena) presenta candidatura en solitariu a les eleiciones

Nun va repetise la candidatura conxunta d’Izquierda Xunida (IX) y Compromisu por Ḷḷena que gobierna’l conceyu con mayoría absoluta. Depués de que los primeros frayaran l’alcuerdu n’avientu por motivos personales, la formación asturianista, con trés conceyalíes, preparó una candidatura que lidera Gelos López, segunda teniente d’alcalde y responsable de Xestión Ambiental y Política Forestal, procedente d’IX.

La propuesta de Compromisu por Asturies (Conciyu Ḷḷena) yera la de caltener l’alcuerdu cola coalición pola necesidá de caltener la xunión na izquierda y, consideraben, el bon llabor desendolcáu polos ediles José Agripino Pérez Acebal, conceyal de Deportes y Participación Ciudadana, y David Suárez ‘Cai’, d’Educación, Cultura y Política Llingüística, a los qu’estos meses se sumó en febreru Carlos García Villamil al dimitir Paco García, responsable d’Urbanismu, Obres y Servicios. La executiva llocal d’IX refugólo n’avientu, decisión que llevó a García a dexar el cargu.

Nesi momentu los responsables de la formación asturianista punxéronse a trabayar nuna candidatura plural y abierta pa les eleiciones municipales del 28 de mayu, que ta acabante de presentase. A ella súmense cuatro conceyales procedentes de IX, López, que va encabezar la candidatura, y Natalia Ahilagas, responsable de Bienestar Social, Mocedá y Mujera, amás de los independientes García y Jorge Fernández Suárez, al frente de Ganadería y Mediu Rural.

“Presentamos una candidatura na que cumplimos cola nuesa promesa de que diba tar formada por muncha xente independiente representativa de diferentes ámbitos del conceyu, centrada en defender los intereses de Ḷḷena pencima de too, ensin depender de nengún otru partíu políticu nin autonómicu nin estatal y cola aspiración de que’l mayu próximu haya un cambiu na Alcaldía que consideramos necesario y sía esti proyeutu’l que consiga la confianza de los ḷḷenizos pa gobernar el conceyu y entamar una etapa nueva”, apunta Pérez Acebal, númberu 3 de la llista.

El 2 va ocupalu Cai, mentes que’l 4 ye p’Ahilagas, el 5 pa García y el 6 pa la ganadera Sandra Hevia. Los ediles actuales García Villamil va dir nel puestu númberu 7 y Fernández Suárez, nel 13.

Pérez Acebal considera que la candidatura presentada ye “afayadiza p’asumir esi retu” pol fechu de que “cuenta cola presencia de seis conceyales del actual equipu de gobiernu, a los que se sumen otru ex conceyal y otra ex conceyala, de manera que combina la necesaria esperiencia na xestión municipal cola incorporación de persones nueves procedentes de los movimientos vecinales y del ámbitu cultural, musical, deportivu, ganaderu, turísticu o asociativo del conceyu, que vienen con ganes d’aportar y de trabayar”. Tamién rescampla la presencia de munches persones venceyaes al mundu rural, “una de les nueses prioridaes”, y que se trata d’una “candidatura interxeneracional” con presencia de xente mozo, como ye’l casu de Celia González, de 19 años, númberu 8.

Sobre la candidata, asegura que “cumple con toles cualidaes pa ser una bona alcaldesa: esperiencia sobrada na xestión municipal, cercanía, saber escuchar a la xente, humildá y capacidá pa trabayar n’equipu y reconocer el llabor de los que l’arrodien”. Asina, “dende’l respetu a tolos partíos políticos, creemos que nestes eleiciones ye esta candidatura de Compromisu por Asturies (Conciyu Ḷḷena) la que tien verdaderes opciones de protagonizar un cambiu políticu nel conceyu”.

Ensin competencies

Cai y Pérez Acebal nun cuenten con competencies dende l’entamu d’esti mes depués de la decisión de l’alcaldesa Gema Álvarez de retirales a los dos conceyales de Compromisu –a García Villamil nun se-y atribuyera nenguna– poco depués de conocese la candidatura de Gelos López. Tamién a la propia segunda teniente d’alcalde, polo que los seis ediles que tán na llista asturianista pal 28-M pasen a ser non adscritos – y l’equipu de gobiernu queda con namái 3 ediles.

Na semeya, los candidatos de Compromisu, con Gelos López nel centru de pie.