“Cola cooficialidá nun hai imposición dalguna”, afirma Barbón

PP y VOX tocaron el tema del asturianu nel turnu d’entrugues al presidente nel Plenu de la Xunta Xeneral. El popular Álvaro Queipo retó a Adrián Barbón a convocar eleiciones pa ver “qué opinen los asturianos sobre’l repartu d’escaños que tien que tener esti Parllamentu de cara a esa reforma del Estatutu”.

La oficialidá del asturianu tornó a ocupar minutos na Xunta Xeneral depués de la convocatoria fecha pol presidente pa tratar esta cuestión nun conceyu conxuntu convocáu pal día 23 cola intención de votala depués nel Parllamentu. Primero foi Queipo, nel marcu d’una pregunta al socialista sobre ‘¿Por qué’l so Gobiernu y los asturianos tienen distintes perceiciones de los problemes principales d’Asturies?’, na que dexó la parte llingüística pa la parte final de la so intervención.

“Afirma tar esmolecíu pola oficialidá de les llingües asturianes”, principió depués de falar de dellos temes como la situación de la sanidá, de la industria o'l paru xuvenil que, apuntó, Barbón nun lu llamó pa tratar con él, polo que considera “que nun-y debieron paecer lo suficientemente importantes”. “Entós, ¿por qué nun l’aprobó na llexislatura anterior? ¿Por qué les torna a usar agora que sabe que nun tien les votos pa sacales alantre? Ye la segunda vez que trata d’engañar a los asturianos con esti tema”, afirmó.

Dixo qu’emplega esta cuestión “como distraición” y que “nun me convoca pa buscar un consensu, yá sabe perfeutamente cuála ye la mio posición”, sinón que lo fai “pa tratar de semar discordia ente los asturianos”. “Yo nun tengo la llexitimación democrática pa principiar una reforma del Estatutu d’Autonomía y vusté nun tien los votos pa facela, polo que tamos nuna caleya ensin salida”, siguió’l popular, qu’añadió que “yo nun creo qu’esista un clamor n’Asturies pa que s’entame esa reforma pola obligatoriedá de les llingües propies, pero si cree que toi equivocáu, y dao que pa vusté ye una prioridá política y asina lo espresó, sólo-y queda un camín, que ye convocar eleiciones y demostralo”.

D’esta forma retólu a ver “qué opinen los asturianos sobre’l repartu d’escaños que tien que tener esti Parllamentu de cara a esa reforma del Estatutu d’Autonomía que vusté pretende”. Y insistió con que “tien dos opciones, convocar eleiciones y dexar d’enredar o abandonar yá los xuegos de tafuru, daqué que sabemos que nun va facer”.

Na réplica Barbón acusó a Queipo de “autoxustificase énte’l so públicu” porque “vusté nun me fala a min nin falaba a los asturianos, güei taba falando al PP, onde internamente xeneróse polémica polos sos revolvinos col asturianu”. “Inclusive en conversaciones privaes llegó a eslizar que’l cambiu de posición del Partido Popular diba ser históricu en rellación a la oficialidá, que nun ye tal, porque quiero recorda-yos que nel pasáu defendieron la oficialidá”, aseguró’l socialista.

“Fáigolo por convicción, fáigolo por coherencia, porque lo llevábamos nos nuesos programes, y fáigolo tamién por oportunidá, porque paecía que con vustedes habría un tiempu nuevu na derecha. Y resulta que nun ye asina, porque intentar quedar bien con tol mundu y tol tiempu ye insostenible nel tiempu”, continuó. Por último, fixo referencia al artículu asoleyáu'l llunes nel diariu ‘La Nueva España’ pol lliberal Eduardo Fernández Luiña de defensa de la oficialidá y insistió na comparación con Galicia: “¿Qué pasa, que los gallegos tienen más derechu a protexer la so llingua que nós? Señor Queipo, sía valiente y lidere a la derecha, nun se dexe arrastrar por ella”.

El socialista avanza l’astención del PP

El siguiente turnu sería pa VOX y la so vocera Carolina López Fernández emplegaríalu pa entrugar ‘¿Considera vusté que la imposición d’una llingua inventada ye l’esmolecimientu mayor que tienen los asturianos anguaño?’. “Lo primero, l’asturianu ye una llingua, nun ye inventada, fale por favor con filólogos y entendería dalgo d’esto. Y en segundu llugar, cola cooficialidá nun hai imposición dalguna”, respondió Barbón.

La diputada emplegó l’argumentariu habitual de la ultraderecha na réplica, mentes que’l socialista emplegó la mayor parte del so tiempu en lleer cachos del artículu de Fernández Luiña. Tamién avanzó a VOX “que van quedar sólos nel non” na futura votación de la reforma del Estatutu na Xunta Xeneral, “porque’l Partido Popular va astenese, yá-yos puedo adelantar el votu”, lo que xeneró comentarios na zona conservadora de hemiciclu.

Na semeya, intervención de Barbón dende'l so escañu xunto a miembros del so Gobiernu y diputaos socialistes.