Barbón confirma la fecha de celebración del conceyu conxuntu pa negociar la oficialidá

El presidente del país fai un llamamientu "pa dar esti pasu, valiente y decidíu y demostrar asina con actuaciones concretes el nuesu compromisu pa col asturianismu".

El xueves 23 de mayu, dos díes enantes d'una fecha significada p'Asturies, el 25 de mayu, cuando se conmemora la declaración de soberanía de la Xunta Xeneral nel 1808 y se vien reivindicando dende'l Gobiernu dende va unos pocos años el Día de la Bandera, va tener llugar el conceyu conxuntu pa negociar una reforma del Estatutu d'Autonomía. Ésta tocará namái l'artículu 4 pa incluyir la oficialidá del asturianu y del gallego-asturiano col oxetivu de "cumplir colo previsto nel artículu 3 de la Constitución española", afirmó anueche Barbón.

"Esta convocatoria fáigola llueu d'observar el cambiu de posición de dalgunos actores políticos y, especialmente, pa dar respuesta a lo que demandó'l presidente de l'Academia de la Llingua Asturiana nel so discursu institucional del Día de Les Lletres Asturianes, el vienres pasáu, nel que pidió que fixéramos un intentu por algamar el consensu necesariu y llograr la oficialidá esta llexislatura", apuntó'l socialista. "Ye la hora de pasar de les pallabres a los fechos. Ye la hora de demostrar, con decisiones valientes y atrevíes, l'asturianismu políticu nel que decimos militar la mayoría de formaciones polítiques. Ye la hora de dar a Asturies lo qu'Asturies lleva tanto tiempu reclamando y merez", añadió.

Esplicó'l darréu'l procesu que se va tomar llueu del conceyu conxuntu del 23 de mayu. La cuestión va llevase a la Xunta Xeneral "al traviés d'una proposición de llei de reforma del Estatutu suscrita por aquellos grupos favoratibles a cumplir col mandatu constitucional", pa depués debatila en comisión parllamentaria y votala, por último, en Plenu.

"P'aprobar la reforma del Estatutu precisa na votación final llograr 27 'sí'. Les astenciones, son, a los efeutos d'esta votación, votos que tienen el mesmo efeutu que los 'non'", polo que fai "un llamamientu a los grupos parlamentarios pa dar esti pasu, valiente y decidíu y demostrar asina con actuaciones concretes el nuesu compromisu pa col asturianismu. Confío que sía asina y de corazón, espérolo". "Nun podemos fallar a Asturies. Cada grupu parllamentariu y cada diputáu tendrá, nes sos manes, la respuesta", concluyó.

Na semeya, Barbón recibe ayeri en Presidencia a la que fora la so conseyera de Cultura, Política Llingüística y Turismu, Berta Piñán la llexislatura pasada. La escritora entregó al presidente un exemplar de 'Argayu / Derrumbe', el so poemariu últimu.