Celébrase'l primer seminariu sobre'l Proyectu Fernán-Coronas

Va ser abiertu al públicu na Aula Escalonada del Edificiu Históricu de la Universidá d'Uviéu. ÚLTIMA HORA: Aplázase'l seminariu pola situación sanitaria a una fecha por confirmar.

El primeru de los seminarios previstos sobre'l Proyectu Fernán-Coronas va desendolcase mañana a les 16 hores. Va consistir nuna xornada esplicativa d'esta collaboración público-privada ente la Conseyería de Cultura, Política Llingüística y Turismu, y la Fundación Valdés-Salas, xunto cola propia institución universitaria, que tien como oxetivu inventariar, clasificar, trescribir, editar y difundir l’ampliu archivu del Padre Galo.

Jesús Menéndez Peláez, de la Fundación Valdés-Salas; Xulio Viejo, direutor científicu del proyectu, y Adrián Martínez Expósito, investigador del mesmu; Jesús Antonio Cid, de la Fundación Menéndez Pidal; Marta Pérez Toral, del Real Instituto de Estudios Asturianos; y Juaco López, direutor del Muséu del Pueblu d'Asturies, y Alfonso Fernández García, del Muséu de la Gaita qu'acueye'l propiu recientu xixonés, van intervenir nesta actividá, que va ser abierta al públicu. Asina l'accesu a l'aula ye llibre hasta completar l'aforu.