Carreño va xugase'l bronce con Djokovic

|
Karén Khachánov y Pablo Carreño

Khachánov y Zverev dieron la sorpresa y van competir pol oru. Primer derrota del combináu de balonmano de Raúl Entrerríos en Tokiu.

Al igual que-y asocedió en dos ocasiones nel US Open, Pablo Carreño quedó a les puertes d'una gran final. Nesta ocasión, una final olímpica.

Nun tuvo acertáu'l xixonés, que venía de superar al númberu 2 del ranking ATP, Daniil Medvédev en cuartos, y tenía enfrenta a otru rusu, el númberu 25, Karén Khachánov. Asina, viose superáu en tou momentu pol tenista d'orixe armeniu, pa perder por 6-3 y 6-3.

El bronce nun va ser fácil pa Carreño, yá que tendrá como rival al númberu 1 del Mundu y gran favoritu, Novak Djokovic, que perdió col alemán Alexander Zverev (1-6, 6-3 y 6-1). El partíu va tener llugar mañana a les 8 hores (15, hora llocal).

Victoria de Francia

La seleición española de balonmano cayó con Francia 31-36, primer derrota en Tokyo 2020. Notó l'equipu la baxa de Morros en defensa, con una entrada al partíu meyor de los franceses, como amuesa'l 12-18 al descansu.

Entrerríos participó nel partíu con 1 gol en 4 llanzamientos. Con esti resultáu, España, a la que-y queda'l choque con Arxentina del domingu a les 7.45 hores (14.45, hora llocal), sigue segunda con 6 puntos, cola clasificación garantizada, mentes que Francia va a los 8.

Otra manera, el combináu de ḥoquei yerba capitaniáu por María López xuega mañana a les 3 hores (10, hora llocal) con Xapón. Un empate garantizaría'l pase a cuartos de final, mentes que nel casu de derrota habría de tar pendiente del partíu de China con Nueva Zelanda qu'empieza media hora enantes.

Na imaxe, Khachánov y Carreño salúdense al final del choque.

Contador Estadistiques