"Bolado consolidóse como poeta escribiendo n'asturianu", afirma Marín Estrada

José Luis Argüelles refierse a él na presentación del llibru 'Cola suavidá del aire', celebrada en Xixón, como "ún de los poetes fundamentales y imprescindible del Surdimientu".

L'editor Carlos González Espina, d'Impronta, axuntó nun actu nel salón d'actos de la Escuela de Comerciu a los responsables del prólogu y epílogu, esto ye, Pablo Antón Marín Estrada y Argüelles, de manera respeutiva, pa falar de Xosé Bolado y de la so obra. Una cita na que se daba a conocer el llibru qu'axunta la obra poética completa n'asturianu del autor fináu nel 2021, un total de 102 poemes recoyíos nos llibros ‘Conxura contra la decadencia’ (2002), ‘Na estación de los relevos’ (2006) y ‘La bona intención’ (2012), amás de na antoloxía del Surdimientu ‘Toma de tierra’ (2010) del propiu Argüelles y nel llibru billingüe póstumu qu'espublizó Esther Muntañola 'Un pájaro tan ligero' (2021).

"La oportunidá de lleer la so obra en conxuntu lo que nos da ye la talla d’un poeta mui singular, un poeta verdaderu", apuntó Marín Estrada na so intervención. "Cuando se llee con atención la so obra, los sos poemes, en comparanza cola so obra anterior en castellanu, vemos na so obra n'asturianu al poeta enteru. Bolado consolídase como poeta escribiendo n’asturianu y nos sos propios poemes pue percibise perfectamente esi autor que de dalguna manera nos redescubre o afonda na poesía al traviés de la propia llingua, y a la vez tamién paez redescubrir esa llingua que conoció na so infancia, esa llingua oculta que toos llevamos como un tesoru y que la memoria te devuelve", siguió.

El llangreanu diferenció ente l'asturianu de la poesía de Bolado y la qu'emplegaba n'intervenciones públiques y trabayos d'investigación. "La poesía d’él ye muncho más rica porque ehí afloraba muncho d’esi léxicu dormíu que va remaneciendo y que dalguna manera va ún buscando como escritor nesa aventura que ye siempre escribir nuna llingua con unes condiciones como l’asturiana", rescampló, pa llueu calificar el so asturianu como "mui guapu, mui emocionante, mui frescu, que define tamién esi mundu de pantasmes presentes y recordaos que tán nos sos versos".

Pa finar, señaló que "tenemos la suerte de poder lleer la so obra, ocasión de conocer más el llabor de Xosé Bolado nesta próxima celebración de les Lletres –en referencia a que la próxima Selmana de les Lletres va tar dedicada a la so figura–, y anque esa atención que nun tuvo nel so día llegue agora cuando yá nun ta, tán los sos versos que siguen valiendo como l’oru puru de les pallabres que s’escriben dende la intelixencia, la sensibilidá y compromisu moral y estéticu que constituyó tola vida de Xosé Bolado".

Con 57 años

Argüelles, pela so parte, consideró a Bolado "ún de los poetes fundamentales y imprescindible del Surdimientu y, poro, del canon d’esi movimientu de renovación de la lliteratura n’asturianu qu’entama metanes los años 70, sobre’l 74 o 75, coles actividaes de Conceyu Bable, con aquelles espublizaciones que facíen en ‘Asturias Semanal’, y que, na mio opinión, ye un movimientu entovía non peslláu por una razón mui cenciella: porque l’asturianu, la llingua asturiana, siguen ensin ser una llingua oficial nel territoriu natural, nel territoriu al que pertenez esta llingua, que ye Asturies". Un reconocimientu, que na so opinión llega por trés fitos: la espublización de 'Un pájaro tan ligero', la del llibru que se presentaba y la próxima edición de la Selmana de les Lletres, en mayu, "una ocasión importante pa que críticos, estudiosos y sobre manera los llectores s’averen a una obra que me paez que define una singularidá ente les distintes sensibilidaes del Surdimientu que convienen sorrayar".

Sobre 'Cola suavidá del aire' destacó que "recueye’l corpus completu de la poesía n’asturianu conocida de Bolado "nuna edición primorosa, como nos tien avezaos Carlos y Marina Lobo, dende la portada; la impecable factura, la tipografía xenerosa, la respetuosa disposición del poema na páxina que non tolos editores lo faen, o l’escelente prólogu de Pablo Antón Marín Estrada, un consumáu llector de la obra boladiana". Darréu centróse n'analizar los porqués de la tardanza nel entamu del reconocimientu de la centralidá de la so obra ente la meyor poesía del Surdimientu, ente los que citó la tardanza n'espublizar la so obra n'asturianu, "con 57 años cumplíos", o la so reticencia n'asoleyar la so creación.

"Nació n'Uviéu nel 1945 y por edá pertenez a la primer xeneración del Surdimientu, pero por estética ye un poeta que bebe dafechu de los principios de la renovación que fixo la segunda xeneración, o la nomada tamién segunda promoción del Surdimientu. Él tuvo mui atentu a lo que se publica y nos 80 espublicen llibros Antón García; Xuan Bello; Berta Piñán; Pablo Antón; Xosé Antonio García, un poeta mui estimable que tampoco nel so día se tuvo en cuenta; y Lourdes Álvarez. Toi falando de seis de los meyores poetes del Surdimientu y Bolado ta mui atentu a lo que se cuece nesos años. Esa segunda promoción lo que fai ye poner n’hora la poesía n’asturianu", esplicó.

Sobre la poesía Bolado apuntó que yera un poeta "de tonu elexíacu, ensin dulda, meditativu, d’estética neosimbolista y n’ocasiones neoespresionista", que "fuxe de suxeción a la rima; él en realidá lo que busca una llinia melódica que suel durar los dos, trés, primeros versos del poema". Y, señaló, cuatro son los "temes fundamentales" de la so obra: "la memoria, el pensamientu d’ún mesmu a lo llargo del tiempu; el propiu tiempu, esto ye, el pasu del tiempu; la tierra, ensin dulda, una de les carauterístique de cuasi tolos poetes del Surdimientu, por eso la mio antoloxía entitulela ‘Toma de tierra’, por esa fixación temática pola tierra; y les erosiones del tiempu".

Tamién recampló del escritor la persona, la "so valía humana, elegancia de tratu. Punxo en too pasión, lluchó poles llibertaes democrátiques y foi mui coherente colo que pensó, nada sectariu". P'acabar, Argüelles, Marín Estrada y González Espina, y dellos voluntarios del públicu, lleeron poemes de 'Cola suavidá del aire', finando l'actu colos versos de 'Magnificat'.

Na semeya, González Espina, Argüelles y Marín Estrada na presentación d'ayeri.