González Espina: “Esti llibru yera una deuda que teníamos con Bolado y colos llectores”

Los poemarios de Xosé Bolado –escritor que nos dexó nel 2021– ‘Conxura contra la decadencia’, ‘Na estación de los relevos’ y ‘La bona intención’ axúntense, con otres creaciones, en ‘Cola suavidá del aire’ (Impronta). L’editor Carlos González Espina (Belonciu, 1959) faló con Asturies.com d’esti llibru llueu de la presentación celebrada esti miércoles en Xixón en collaboración col Atenéu Obreru.

¿Qué ye ‘Cola suavidá del aire?

Ye la obra poética completa n’asturianu de Bolado. Publicamos xuntos los trés llibros que se publicaren nel 2002, 2006 y 2012, en Llibros del Pexe –los dos primeros– y n’Impronta, más unos cuantos poemes sueltos qu’asoleyara en ‘Lliteratura’ y otres revistes, y dalgunos qu’apaecieron na antoloxía ‘Toma de tierra’ de José Luis Argüelles y nel llibru póstumu que publicó Esther Muntañola. Poro, colo que yo sé, ta tola obra poética publicada por Bolado n’asturianu.

¿Cuántos poemes son en total?

Son 102 poemes.

Falaba na presentacion que cola espublización d’esta obra completaben el duelu pola perda de Bolado.

Ésti yera un proyectu que teníemos falao con él xusto antes de que s’agravase la enfermedá y nun se pudo terminar en vida de Bolado, y eso siempre te dexa mal cuerpu. Col pasu del tiempu, depués de la so muerte, pensamos que yera una deuda que teníamos con él y colos llectores.

¿Quedaron contentos col resultáu final?

Quedamos mui contentos porque ye un llibru que pudimos facer a gustu. Siempre pensamos qu’a él diba gusta-y muncho esti tipu d’obra completa. Nun ye un poeta, como otros, que tien una obra completa de miles de poemes, él yera un home discretu pa too, de poques palabres, pero les palabres xustes y bien diches, cuando falaba pero tamién cuando escribía.

¿Qué supunxo Bolado pa la poesía n’asturianu?

Bolado ye un home que tuvo una importancia enorme, non sólo pa la poesía, sinón pa la lliteratura y pa la cultura asturiana, pero hasta agora reconocíase-y por otres facetes suyes como la de promotor, editor de revistes o impulsor y animador de xóvenes a publicar; d’ayudar a la xente dende coleiciones qu’él dirixía, de la propia revista ‘Lliteratura’. Tamién de les tertulies nes que participaba, inclusive en Madrid; él foi de los qu’animó a Alejandro Fernández-Osorio a publicar.. Siempre tola vida tuvo eso, tamién como enseñante. Alumnos suyos falen maraviyes de Bolado, una persona que-yos animaba a lleer.

Y toes eses facetes de promotor, animador y tamién investigador y críticu lliterariu, atentu a lo que publicaben otros, tapaba un poco la parte creativa suya. A él, como yera un home tan discretu, había que dir arrancando-y los llibros prácticamente. Y agora que los axuntamos y que los vemos nun estoiru guapu yo creo que se va valorar la calidá d’un poeta que ye de los meyores poetes qu’escribieron n’asturianu, con una personalidá mui propia amás y mui diferenciada de tolos demás.