La coalición Bloque-UNA-LV-GV asoleyó esti vienres un comunicáu nel que valora los sos sos resultaos nes eleiciones del 25-M. La formación fai autocrítica y afirma que va siguir trabayando pa consolidar el so proyeutu xunitariu.
 
La coordinadora de la coalición apunta que los resultaos de les eleiciones, onde sumó 1.639 votos (un 0,32 por cientu del total) “solo pue calificase de malu” y abre un periodu de reflexón dientro de Bloque por Asturies-Unidá Nacionalista Asturiana-Los Verdes-Grupo Verde (Bloque-UNA-LV-GV). “Les causes que nos llevaron a esti númberu de votos, tan per debaxo de les mires, entendemos que son tanto esternes como internes, y especialmente nel segundu casu, han de llevanos a una autocrítica fonda que modifique formes d'actuación, d'organización, de comunicación y d'estratexa”.
 
Asina, los responsables de los trés partíos consideren que “nun escenariu difícil, impuestu en parte poles circunstancies, nun supimos atopar un güecu, un discursu y una práutica qu'ilusionara a les más de 6.000 persones que nos votaren en mayu –en parte pola lentitú nel procesu d'afitamientu y visibililización d'una alternativa común nos meses últimos– nin consiguimos llegar a sectores nuevos a los que dirixíamos el nuesu
discursu, y a pesar del esfuerzu realizáu na nuesa campaña, el nuesu mensaxe nun llegó a más que 1.600 persones, yá que nun fuimos a tresmitir que la nuesa coalición podía ser una alternativa válida a los dos grandes bloques que se formaren”. D’igual forma, apunten como otra causa’l fechu de que la población interpretara esta cita como una segunda vuelta de les eleiciones de mayu “na que les opciones amenorgábense principalmente a dos: desallugar a Foro al traviés d'un gobiernu de PSOE ya IX o torgar que volviera'l PSOE al gobiernu asegurando un gobiernu de FAC. Nesi escenariu, l'espaciu d'actuación y de tresmisión del nuesu mensaxe y propuestes convertióse en mínimu y el llamáu votu útil xugó na nuesa contra d'una manera evidente”.
 
“Agora ye'l momentu de mirar p'alantre, facer autocrítica, reflexón, deprender de los erros, valorar positivamente y afitar los aciertos, y trabayar con rixu y responsabilidá pensando nel futuru. Sicasí, nun podemos escaecenos de dar les gracies a una militancia bien activa qu'a pesar de les dificultaes y la escasez de medios, trabayó con ilusión y ensin descansu na campaña, nin podemos dexar de señalar que'l trabayu conxuntu ente
organizaciones con xénesis y práutiques polítiques distintes cada día ye más fácil”, continúa’l comunicáu. La coordinadora de la coalición sigue pensando en qu’esti “proyeutu políticu asturianu autónomu, pensáu y articuláu dende la izquierda, l’asturianismu, l’ecoloxismu y enraizáu nos movimientos sociales, ye necesariu nel nuesu país, polo qu’entiende que “agora ye'l momentu de que les organizaciones que formen esta coalición analicen el contestu políticu, faigan les sos reflexones y les pongan en comuña pa redefinir el proyeutu y siguir, tres esta esperiencia de la que tenemos enforma qu'aprender, col procesu de xunión, ampliación y afitamientu d'un proyeutu conxuntu y ampliu que se quedó atayáu pola convocatoria electoral”.
 
Por último, dende’l Bloque-UNA-LV-GV afirmen tar “convencíos y convencíes de qu'hai munchos miles de persones a los que nun lleguemos nesta ocasión, pero que pueden volver enfotase en nós, o facelo per primer vegada. Por ello, facemos una llamada a correxir con humildá y realismu los nuesos erros y convidamos a quien crea n’una alternativa d'esti tipu, quien nos votó y quien nun lo fixo, a la xuntura pa llevantar con fuerza y ente toos y toes l'alternativa política y la Asturies que queremos”.