Belén Fernández dexa'l so cargu de conseyera

Reprobada pola Xunta Xeneral el mes pasáu, alega motivos personales. Fernando Lastra ye'l so sustitutu n'Infraestructures, Ordenación del Territoriu y Mediu Ambiente.

Belén Fernández González treslladó al presidente Javier Fernández el so deséu de dexar la so responsabilidá al frente de la conseyería por motivos personales y, asina, reincorporase al so puestu de funcionaria na Alministración nacional, noticia que se dio a conocer el vienres. El xefe del Executivo asturiano agradeció-y "la so intensa dedicación y el bon trabayu fechu nos años últimos nun departamentu de gran complexidá pol volume ampliu d'asuntos que xestiona", indicaron dende'l Gobiernu.

El pasáu 12 de mayu, la conseyera foi reprobada pola Xunta Xeneral tres la xestión polémica de los casos de contaminación que vien viviendo'l país. Yera la tercera qu'afrontaba y la primera que salía alantre al tener l'apoyu de tolos grupos parllamentarios, cola esceición única del de so, la FSA-PSOE.

El so sustitutu nel cargu ye Lastra (Cangas del Narcea, 1958), voceru socialista na Xunta Xeneral y un pesu importante dientro de la organización.