Barbón afirma que "la proteición del asturianu y del eonaviego nun se consiguiera ensin el desarrollu autonómicu"

El presidente fixo una declaración institucional pol cuarentenu aniversariu de la toma de posesión de Rafael Fernández como primer dirixente d'Asturies.

"N'Asturies tenemos munches razones pa sentinos arguyosos del nuesu pasáu y de la nuesa identidá", principió Adrián Barbón nun discursu en castellanu dafechu, que se refirió a la efeméride como "un fitu na historia de la nuesa comunidá". Nel mesmu señaló a Fernández como "un símbolu de la reconciliación" al "regresar a Asturies coles manes abiertes, con voluntá de diálogu y alcuerdu, enfotáu n'amosar que la convivencia yera posible".

Asina, apuntó que representó "la política útil, tán alloñada a la descalificación gratuita y cotidiana frecuente estos díes y que'l mio Gobiernu quier desaniciar". "Namái pol so talante merez qu'honremos la so memoria, pero Rafael Fernández tamién supo entender cuál yera'l desafíu principal al que s'enfrentaba aquella comunidá autonóma que taba en xerme: resolver los problemes de la ciudadanía", espresó darréu.

Nun videu grabáu en Presidencia, frente al cuadru de Fernández, el presidente actual calificó a Asturies, 40 años depués de l'autonomía, como "una referencia na Sanidá, na Educación y nos servicios sociales". Asina, enumeró dellos llogros y, ente ellos, nel terrén cultural, rescampló que "equipamientos como'l Centru Niemeyer, l'ameyoramientu del Muséu de Belles Artes, Llaboral Ciudá de la Cultura, la custodia del prerrománicu asturianu o la proteición del asturianu y del eonaviego tampoco nun se consigiuiera ensin el nuesu desarrollu autonómicu qu'entamó con asosiegu y un inmbatible talentu conciliador Rafael Fernández".

Por último, citó como grandes retos "la doble transición ecolóxica y dixital", una reindustrialización nueva d'Asturies que va poner a prueba la capacidá de los asturianos y que "vamos algamar como fiximos siempre, defendiendo los avances nes llibertaes, la igualdá y la calidá democrática, con plenu respetu a la Constitución, incluyíu'l desendolcu lleal y solidariu del nuesu autogobiernu y una fonda reivindicación de la nuesa propia identidá como habitantes d'esta tierra cargada d'historia y con fame de futuru".