Asturies rexistra 4 casos nuevos de COVID-19, anque sigue evitando la tresmisión comunitaria

|
Asturies rexistra 3 casos nuevos de COVID-19, anque sigue evitando la tresmisión comunitaria

Esta fin de selmana detectáronse cuatro casos nuevos de COVID-19 n’Asturies depués de cuatro díes ensin contaxos. Trés son casos importaos, de Catalunya, Cantabria y Comunitat Valenciana, polo que’l país sigue evitando la tresmisión comunitaria nun tiempu de biltos en tol Estáu y delles situaciones descontralaes, mentes que del cuartu entovía nun se conocen los datos concretos.

El sábadu la Conseyería de Salú comunicó’l primeru, una moza que presentaba síntomes leves compatibles col coronavirus SARS-CoV-2. Regresara de Catalunya y tres facer una prueba por PCR na área sanitaria d’Uviéu ta en cuarentena nel so llar.

Los dos casos restantes comunicáronse ayeri. Trátense d’un home que pasara una estancia en Santander, atendíu na área sanitaria de Xixón, y una muyer procedente de València a la que-y tomaron les muestres na d’Avilés.

Al igual que nos 7 positivos previos que se detectaron n’Asturies nes selmanes últimes, los síntomes de los afectaos son leves y tán pasando la COVID-19 aisllaos nos sos domicilios, y el Serviciu de Vixilancia Epidemiolóxica ta actuando con rapidez pa controlar los contautos estrechos. D’esta forma ta consiguiéndose evitar la tresmisión comunitaria que se ta dando n’otros llugares, como Barcelona, como yá reconoció’l ministru de Sanidá, Salvador Illa, y que significa que’l coronavirus ta ensin control al nun poder determinar l’orixe del contaxu de los casos nuevos, lo que podría obligar a confinamientos nuevos.

ÚLTIMA HORA: La Conseyería de Salú ta acabante de confirmar un cuartu casu, del que nun dio datos. Los cuatro positivos, que ponen el total en 2.446, son l'únicu cambiu de los datos de la serie con respeuto a los comunicaos el vienres correspondientes al xueves.

Control en 24 hores

Adrián Barbón, nuna rueda de prensa de valoración del so primer añu como presidente, rescampló que Asturies, en 24 hores, pue controlar tolos contautos estrechos de les persones que dan positivu na prueba PCR y nun refugó confinamientos parciales nel casu de que se dea una tresmisión comunitaria. L’informe últimu ministeriu sobre la situación de la COVID-19 espón como’l país contacta, diagnostica y aíslla casos positivos con mayor anticipación que la media estatal.

Semeya obra d'Armando Álvarez.

Contador Estadistiques