Día del Llibru Asturianu

Asturies relluma na Grande Parade des Nations Celtes per An Oriant

|
Prau Llerón na Grande Parade des Nations Celtes

El Grupu Folclóricu Prau Llerón, de Mieres, y la Banda Gaites Fonte Fuécara, de Llanera, amosaron la música tradicional asturiana a les miles de persones que siguieron la Grande Parade des Nations Celtes nes cais d’An Oriant y pela televisión. El XLIX Festival Interceltique de Lorient sigue esti llunes cola actuación de L-R.

Asturies ta siendo protagonista, un añu más, nel certame al rodiu la cultura celta más importante del mundu. El pabellón del país na Quai des Pays Celtes caltiénse como puntu de parada fixa de los asistentes al Interceltique, atrayíos pola sidra y los nuesos productos, mentes que los miembros de la delegación asturiana tán dexando’l nivel mui altu.

Fonte Fuécara, nel puestu 14, y Prau Llerón, nel 47, participaron ayeri na Grande Parade des Nations Celtes xunto con otres agrupaciones procedentes de Breizh, Galicia –país al que ta dedicáu’l festival esti añu–, Éire, Alba, Cymru, Kernow o Mannin, asina como de la diáspora celta n’otros puntos del planeta, hasta sumar cerca de 3.500 artistes. Unes 75.000 persones viéronla dende les cais d’An Oriant, mentes que munchos miles más fixéronlu en tol mundu pela señal de la televisión francesa.

Dambes formaciones tamién actúen na Nuit Interceltique Bretagne, espectáculu que se celebra nel Stade du Moustoir, campu del FC Lorient, que güei descansa y nun dexa a naide indiferente, y lleva la so música y bailles pela villa mientres la selmana. Mentes, L-R va dar un conciertu esta tarde, a les 21.30 hores nel Palais del Congrès, xunto con Mairi Rankin y Eric Wright, dúu procedente de Cap Breton.

Rubén Alba completa la delegación asturiana. El gaiteru va ufrir dos actuaciones, la primera’l miércoles a partir de les 21.30 hores na Quai de la Bretagne dientro del ciclu La Bretagne Invite, xunto con Nevolen (Breizh) y Ti Lyannaj (Breizh y Guadeloupe), y la segunda’l xueves a les 15 hores nel Palais del Congrès, nel ciclu Après-midi du Folk, compartiendo escenariu colos galeses NoGood Boyo.

El Mac Crimmon viaxa a Galicia

El sábadu celebróse’l XXXIV Trophée Mac Crimmon, que tres seis victories asturianes siguíes viaxó nesta ocasión a Galicia. La gaitera María López Carballo empató col asturianu Fernando Vázquez Cárcaba, pero llevó la competición al ser más moza que’l so rival, convirtiéndose asina na segunda muyer n’algamalu tres l’asturiana Andrea Joglar, vencedora nel 2010.

Na imaxe, Prau Llerón na Grande Parade des Nations Celtes. Semeya obra d'Alejo Fernández.

Contador Estadistiques