Asturies presenta “una delegación de nivel y mui motivada” nel Interceltique de Lorient dedicáu a Galicia

|
Asturies presenta “una delegación de nivel y mui motivada” nel Interceltique de Lorient dedicáu a Galicia

La delegación asturiana, “de nivel y mui motivada”, llegó al rodiu de les 11 hores del vienres a An Oriant preparada pa representar al país nel XLIX Festival Interceltique de Lorient, dedicáu esti añu a la vecina Galicia. Mientres 10 díes esta población bretona va convertise na capital mundial de la cultura celta.

Venti añu depués torna al festival la Banda Gaites Fonte Fuécara, de Llanera, mentes que s’estrena el Grupu Folclóricu Prau Llerón, de Mieres, “polo que la ilusión ente los sos integrantes ye máxima”, esplica Iñaki Sánchez Santianes, responsable de la delegación asturiana. Ésta ta compuesta por unes 90 persones y complétenla los músicos de Rubén Alba y L-R, los cuatro gaiteros que van competir nel Trophée Mac Crimmon, nueve lluchadores de baltu y l’artista Tania Blanco, ensin escaecer a Alfredo González y Silvia Quesada, y los miembros de Stolen Notes que van formar parte de la programación del pabellón d’Asturies, baxo xerencia nueva a cargu de l’Asociación Asturies Gayaspera, onde va servise sidra de Cortina y productos asturianos.

La primera participación va ser la de Pedro Pangua, que va poner una clase maxistral de gaita mañana a les 10 hores nel Palais del Congrès xunto col gallegu José Manuel López. Nel mesmu llugar, a les 14.30 hores, va celebrase’l XXXIV Trophée Mac Crimmon, qu’enfrenta a gaiteros asturianos y gallegos, y que’l país vien dominando nes seis años últimos.

Los nuesos representantes esti añu, que ganaron plaza al traviés del Memorial Remis Ovalle, son Fabián Fernández, Daniel Meré, Francisco Fernández y Fernando Vázquez Cárcaba, que yá participó l’añu pasáu, cuando ganó Javier Menéndez González. Éstos han d’interpretar pieces asturianes, gallegues y bretones, al igual que los sos cuatro rivales gallegos.

Grande Parade des Nations Celtes

Pela nueche, nel Stade du Moustoir, campu del Lorient, va celebrase la primer de les Nuit Interceltique Bretagne, el gran espectáculu del festival nel que tomen parte Fonte Fuécara y Prau Llerón en representación d’Asturies, y que tien funciones tamién el domingu, el martes, el miércoles y el xueves. El domingu, dende les 10 hores, tamién van tomar parte na Grande Parade des Nations Celtes, el momentu más destacáu del Interceltique qu’axunta a miles de persones nes cais d’An Oriant y que siguen millones al traviés de la señal de televisión a tol mundu.

Los de Llanera y los de Mieres tienen programaes dos pasucais el llunes (11.30 hores) y el miércoles (18.30 hores) pel centru de la villa, xunto col grupu de baille mierense, y la banda gaites va actuar nel Espace Marine, l’escenariu principal del certame, el mesmu llunes a les 14.30 hores dientro del ciclu Musiques et Danses des Pays Celtes xunto colos córnicos Bolingey Troyl, los escoceses Keltika Dancers y los austrialianos The City of Adelaide Pipe Band. El llunes tamién va tocar L-R, a les 21.30 hores nel Palais del Congrès, xunto con Mairi Rankin y Eric Wright, dúu procedente de Cap Breton.

Pela so parte, Rubén Alba va ufrir dos conciertos. El primeru va ser el miércoles a partir de les 21.30 hores na Quai de la Bretagne dientro del ciclu La Bretagne Invite, xunto con Nevolen (Breizh) y Ti Lyannaj (Breizh y Guadeloupe), y la segunda’l xueves a les 15 hores nel Palais del Congrès, dientru del ciclu Après-midi du Folk, compartiendo escenariu colos galeses NoGood Boyo.

Anée de la Galice

Galicia va ser el país protagonista d’esta edición del Interceltique, dirixíu pol asturianu Lisardo Lombardía. Carlos Núñez, Milladoiro, Mercedes Peón y Xacarandaina son los principales representantes del país vecín que se van desplazar a An Oriant.

El festival, mentes, tamién inclúi nel so ampliu programa les actuaciones d’artistes de la sonadía de Goran Bregović, Nolwenn Leroy o Soldat Louis, ente otros munchos.

Contador Estadistiques