Asturies estudia 19 destinos direutos n’Europa pa siguir aumentando la conexón aérea

L’oxetivu ye contar con 38 rutes nel 2033. Asturies estudia hasta 19 destinos posibles pa siguir aumentando la conexón aérea del aeropuertu, cola vista puesta en Suiza, Centroeuropa y Escandinavia, y consolidar la presencia en mercaos a los que yá hai vuelos anguaño.

A diez años vista’l Gobiernu pretende algamar los 2,5 millones de pasaxeros nel Aeropuertu d’Asturies –nel 2023 hebo 1,9, récor históricu– cola implantación de 38 conexones direutes. Nesti ivernu hai 22, 13 estatales y 9 a otros países europeos, y en branu hai anunciaes 28.

La viceconseyera de Turismu, Lara Martínez, comunicó esta mañana na madrilana Feria Internacional de Turismo (Fitur) la fueya de ruta na estratexa de coneutividá aérea del Executivu, que pon la vista sobre manera en trés mercaos: Suiza, Centroeuropa y Escandinavia. Asina tán analizándose enllaces con aeropuertos de Genèva y Zürich; Praga, Varsovia y Viena; y Oslu y Copenḥague, de manera respeutiva.

D’igual forma, pa consolidar los mercaos actuales estúdiase la posibilidá de coneutar l’Aeropuertu d’Asturies tamién con Naunnt, Tolosa, Lyon y Marselha, en Francia; Berlín y Hamborg, n’Alemaña; Dublín, n’Éire; Firenze, Bulåggna y Napule, n’Italia; y dientro del Reinu Xuníu, Manchester n’Inglaterra y Edimburgu/Dùn Èideann n’Alba. Anguaño dende Santiagu’l Monte vuélase a Düsseldorf-Weeze, Bruxeles-Charleroi, Roma-Fiumicino, Milàn-Bèrghem, Londres-Stansted, Londres-Gatwick, París-Orly y Ámsterdam, rutes a les que na temporada de branu van incorporase Frankfurt am Main y Minga/München, que tornen a trabayar Lufthansa depués del parón d’iviernu, con billetes yá a la venta.